२७ पुस, काठमाडौं । जय ट्रफी एलिट कप अन्तर्गत शनिबार भइरहेको नेपाल पुलिस क्लब र बागमती प्रदेशबीचको खेलमा पुलिसका श्रवन यादवले ह्याट्रिक विकेट लिएका छन् । यो जय ट्रफीकै पहिलो ह्याट्रिक हो ।
बागमतीसँगको पहिलो इनिङको खेलको २७औं ओभरमा श्रवणले ह्याट्रिक लिएका हुन् । उनले २७औं ओभरको चौथो, पाँचौं र छैटौं बलमा विकेट लिए ।
उनले प्रतिक श्रेष्ठलाई १२ रनमा बोल्ड गरे भने लगत्तै अर्को बलमा सुर्य तामाङलाई बोल्ड गरे । त्यसपछिको बलमा बागमतीका कप्तान सन्दीप लामिछानेलाई क्याचआउट गराए ।
बागमती प्रदेश पहिलो इनिङमा ११२ रनमा अलआउट भएको छ । बागमतीका इशान पाण्डेले सर्वाधिक ७१ रन बनाए । श्रवणले ३ विकेट लिँदा स्पीनर ललित राजवंशीले ४ तथा कुशल भुर्तेलले २ विकेट लिए ।
