२५ पुस, काठमाडौं । मच्छिन्द्र एफसीले एन्फा यू-१६ युथ लिगमा दोस्रो जित हात पारेको छ । लिगअन्तर्गत बिहीबार एन्फा कम्प्लेक्समा भएको खेलमा मच्छिन्द्रले एफसी खुमलटारलाई २-० ले पराजित गरेको हो ।
मच्छिन्द्रले दुवै गोल अन्तिम १० मिनेटमा गरेको थियो । हिमाल थिङले ८२औं मिनेटमा गोल गर्दै मछिन्द्रलाई अग्रता दिलाएका थिए । त्यसको दुई मिनेटपछि मच्छिन्द्रका सौगात कुमार बोम्जनले गोल गरेका थिए ।
लगातार दुई जितपछि मच्छिन्द्रले ६ अंक जोडेको छ । मच्छिन्द्रले पहिलो खेलमा हिमालयन शेर्पा क्लबलाई हराएको थियो ।
एन्फा कम्प्लेक्समै बिहीबार भएको संकटा एफसी र फ्रेण्ड्स क्लबबीचको खेल भने गोलरहित बराबरीमा सकिएको छ ।
