काठमाडौं/नेपाल प्रहरीका पूर्वआईजीपी सर्वेन्द्र खनाल आफूलाई निकै स्मार्ट ठान्छन् ।
अहिले पनि उनले बहालवालाकै जस्तो रवाफ देखाउन थालेका छन् । सांसद अपहरण काण्डमा मुछिएका खनाल यसबीचमा एमाले प्रवेश गरी काठमाडौं र तनहुँ १ बाट चुनावसमेत लडे ।
तर दुवैतिर लज्जास्पद ढंगले पराजित भए । आफूलाई केपी ओलीको किचेन क्याबिनेट मान्ने खनाल केही दिनअघि आफूभन्दा जुनियर अधिकृतबाट रामधुलाई खानबाट जोगिए ।
गत मंसिर १७ गते सशस्त्र प्रहरी बलका पूर्वडीआईजी माधव थापाको छोराको विवाह भोजमा खनाल धुलोपिठो हुनबाट बालबाल बचेका हुन् । लाजिम्पाटस्थित होटल र्याडिसनमा आयोजित भोजमा धेरैजसो प्रहरीकै भूपू अधिकारीहरू निम्तालु थिए ।
भोजमा मदिराको चुस्कीसँगै राजनीतिक विषयमा कुराकानी हुन थाल्यो । पूर्वएआईजी राजेन्द्रबहादुर सिंह र सर्वेन्द्र खनाललगायतबीच वर्तमान राजनीतिक परिस्थितिको बारेमा कुराकानी हुन थाल्यो ।
सिंहले दलहरू असफल हुन थालेको बताएपछि खनालले राजाको पक्षमा जनता नआएको प्रतिवाद गरे । सोही समयमा नेपाल प्रहरीकै पूर्वएसपी दीपक खरेल आइपुगे ।
उनले खनाल परिवारलाई राजावादी, कांग्रेस, माओवादी, एमाले भएको आरोप लगाए । खनाल रिसाउँदै ‘तैँले के भनिस् रे’ भन्दै उनलाई गाली गर्न थालेपछि आक्रोशित भएका खरेलले कसलाई तँ भनेको भन्दै खनालको कठालो नै समाते ।
खरेल र खनालबीच मल्लयुद्ध नै सुरु भएपछि अरुले दुवैलाई तितरवितर पारेपछि स्थिति सामसुम पारेका थिए ।
