धिरेन्द्र तिवारी/
वीरगञ्ज । माध्यमिक शिक्षा परीक्षा (एसइई) सकेका पर्सा, बारा, रौतहट र आसपासका जिल्लाका विद्यार्थी तथा अभिभावकहरूलाई लक्षित गर्दै वीरगञ्जमा एक विशेष शैक्षिक तथा करियर मेला आयोजना हुने भएको छ। आगामी जेठ ३० गते, शुक्रबार बिहान ९ बजेदेखि साँझ ५ बजेसम्म सञ्चालन हुने उक्त ‘भविष्य मेला २०२५’ मा करिब तीन हजारभन्दा बढी विद्यार्थी तथा अभिभावकको सहभागिता हुने अपेक्षा गरिएको छ।
कार्यक्रम निर्देशक नवीन कार्कीका अनुसार, मेला केवल शैक्षिक प्रदर्शनीमा सीमित नरही विद्यार्थीको शैक्षिक, व्यावसायिक र व्यक्तिगत भविष्य निर्माणमा मार्गदर्शन गर्ने परिवर्तनकारी प्लेटफर्म बन्ने लक्ष्यसहित तयार गरिएको हो। “शब्द ‘भविष्य’ ले आशा, सम्भावना र प्रगतिको प्रतिनिधित्व गर्छ,” कार्की भन्छन्, “यस मेलामार्फत हामी विद्यार्थीलाई दीर्घकालीन दृष्टिकोणसहित आफ्नो लक्ष्य तय गर्न उत्प्रेरित गर्नेछौँ।”
मेलाको प्रमुख उद्देश्य पर्सा, बारा र रौतहटका शहरी तथा ग्रामीण क्षेत्रका विद्यार्थीहरूलाई विज्ञान, व्यवस्थापन, इन्जिनियरिङ, चिकित्सा, कानुन, पत्रकारिता लगायतका शैक्षिक धाराहरूको जानकारी दिनु हो। विद्यार्थीहरूलाई आफ्नो रुचि, क्षमता र पारिवारिक अवस्थाअनुसार उचित शैक्षिक मार्ग छनोट गर्न सहयोग पुग्ने अपेक्षा गरिएको छ।
मेलामा सहभागी शैक्षिक संस्थाहरूले आफ्ना कार्यक्रम, पूर्वाधार, छात्रवृत्ति योजना, उद्योग साझेदारी, अन्तर्राष्ट्रिय समन्वय र अतिरिक्त सुविधाहरूको जानकारी गराउनेछन्। यसबाहेक विद्यार्थी भर्नाका लागि शुल्क छुट, विशेष छात्रवृत्ति तथा प्राथमिक भर्ना जस्ता योजनाहरू पनि मेलामा सार्वजनिक गरिनेछन्।
कार्यक्षालादेखि जीवन बदल्ने कथासम्म
मेला अवधिभर विभिन्न करियर कार्यशाला, विद्यार्थी मार्गदर्शन सत्र र पूर्व विद्यार्थीहरूका प्रेरणादायी अनुभवहरूको प्रस्तुति हुनेछ। “हामी मेलालाई केवल सूचनाको आदानप्रदान मात्र होइन, प्रेरणा र परिवर्तनको अभियान बनाउन चाहन्छौं,” कार्कीको भनाइ छ।
समावेशिता र पहुँचको प्रत्याभूति
मेला विशेषतः ग्रामीण तथा आर्थिक दृष्टिले पछाडि परेका समुदायका विद्यार्थीलाई लक्षित गर्दै मेरिट र आवश्यकतामा आधारित छात्रवृत्ति, निःशुल्क शैक्षिक सामग्री, स्टेशनरी किट, टेक ग्याजेटजस्ता सुविधाहरू पनि प्रदान गरिनेछ। साथै, बैंक तथा टेलिकम संस्थासँगको सहकार्यमा निःशुल्क डिम्याट खाता, बैंक खाता, आँखा परीक्षण सेवा र सिमकार्ड वितरण पनि गरिनेछ।
स्थानीय सहकार्यले थप बलियो आधार
मेलामा वीरगञ्जका निजी तथा सामुदायिक विद्यालयहरूको सक्रिय सहभागिता सुनिश्चित गरिएको छ। स्थानीय विद्यालय, व्यवसाय, बैंक तथा मिडियासँगको सहकार्यले मेलालाई अझ प्रभावकारी बनाउने विश्वास आयोजकको छ। “हामी मेलामार्फत वीरगञ्जलाई क्षेत्रीय शैक्षिक केन्द्रको रूपमा स्थापित गर्ने अभियानमा छौँ,” स्थानीय युवा नेता राकेश यादवले बताए।
जानकारीको खाडललाई पुरा गर्ने प्रयास
अधिकांश विद्यार्थी तथा अभिभावक शैक्षिक विकल्प, छात्रवृत्ति र करियर संभावनाका विषयमा अझै अनभिज्ञ रहेको उल्लेख गर्दै कार्कीले मेलाले यस्तो जानकारीको अभाव पूर्ति गर्ने उल्लेख गरे। “विश्वसनीय जानकारीको अभावले धेरैको भविष्य अन्योलमा पर्छ। यही कारणले यो मेला आवश्यक छ,” उनले थपे।
सर्वसाधारणलाई खुला निमन्त्रणा
‘भविष्य मेला २०२५’ मा वीरगञ्ज तथा आसपासका सबै विद्यार्थी, अभिभावक, शैक्षिक संस्था तथा व्यवसायलाई सहभागिताका लागि आयोजकले हार्दिक आमन्त्रण गरेको छ। मेलालाई शैक्षिक जागरूकता, करियर परामर्श र सामुदायिक सहकार्यको उत्कृष्ट संयोजनका रूपमा हेरिएको छ।
स्थानीय अभिभावक सुनिता कुमारी भन्छिन्, “यस्ता पहलले विद्यार्थीलाई आफ्नो शहरमै गुणस्तरीय शैक्षिक अवसरहरूबारे जान्न सहयोग पुग्छ। यसले शिक्षामा नयाँ आयाम थप्नेछ।”
