काठमाडौं । राजनीतिक संरक्षणमा रहेका गुन्डा नाइकेले ब्यवसायीमाथि आक्रमण गर्दा पनि प्रहरीले पक्राउ नै नगर्ने, गरे पनि मुद्दा कमजोर बनाएर पेश गर्ने गर्दा दण्डहीनताले प्रश्रय पाएको छ । नेता र प्रहरीले संरक्षणले ज्यानै लिनेगरी आक्रमण गर्नेहरुलाई पक्राउ नै नगर्ने र गरिहाले पनि मुद्दा कमजोर बनाउने क्रमले लगानीकर्ताहरु निराश भएका छन् । गएको असार १५ गते ठमेलको ओमनिया क्लब तोडफोड गर्ने र संचालक राजेन्द्र गुरुङमाथि सांघातिक आक्रमण गर्नेहरुलाई प्रहरीले पक्राउ गर्न चासो नै देखाएन ।
लामो समयदेखि काठमाडौंका विभिन्न स्थानमा जुवा अखाडा संचालन गर्दैआएका शैलेश श्रेष्ठ र युवराज श्रेष्ठको कनेक्सन सोझै कांग्रेस महामन्त्री गगनकुमार थापासँग भएकाले उनीहरुलाई प्रहरी बृत्त लैनचौरका डीएसपी गणेश बमले पक्राउ नै गर्न आनाकानी गरे । काठमाडौं प्रहरी परिसरका एसपी दानबहादुर कार्कीले समेत १५ दिनसम्म उनलाई पक्राउ गर्न चासो नै नदेखाएको आरोप लाग्यो । कुटपिटको सीसी क्यामेरा फुटेज मिडियाले बाहिर ल्याएपछि मात्र प्रहरीको चासो बढेको थियो ।
सीसी टीभी फुटेज बाहिरिएपछि दबाबमा परेको प्रहरीले घटना घटेको १५ दिनपछि असार ३० गते प्रहरीले उनलाई पक्राउ गरेको छ । ठमेलस्थित ओमनिया नाइट क्लबका सञ्चालक र बाउन्सरमाथि कुटपिट गर्ने नाइके सानुभाइ भन्ने युवराज गुरुङ र शैलेश श्रेष्ठले कांग्रेस महामन्त्री गगन थापालाई हेलिकोप्टर चार्टर गरी विभिन्न कार्यक्रममा लगेका तस्वीरसहितका समाचार बारम्बार आइरहेका छन् । पछिल्लो समय युवराज गुरुङको कनेक्सन अर्थमन्त्री डा. प्रकाशशरण महतसँग पनि बाक्लै देखिएको छ । नुवाकोट घर भएका गुरुङले पक्राउ परिसकेपछि डा. महतमार्फत् दबाब दिई मुद्दा कमजोर बनाउने चलखेल गरेको प्रहरी स्रोत बताउँछ ।
असार १५ मा क्लब प्रवेश गर्दा आफूलाई ‘सम्मान भएन’ भनेर युवराज सहितका युवाहरूले क्लब सञ्चालक राजेन्द्र गुरुङ, बाउन्सर र कर्मचारीलाई कुटपिट गरेर भागेका थिए । उनीहरूमाथि रेष्टुरेन्ट तथा लाउन्जहरुमा गएर लाखौँ रुपैयाँको खानपिन गर्ने र बिल तिर्ने बेला कर्मचारी तथा क्लब सञ्चालकहरूमाथि कुटपिट तथा तोडफोड गरेको आरोप छ ।
युवराज गुरुङ ८ बर्षअघि २०७२ भदौमा प्रहरी इन्काउन्टरमा मारिएका कुमार श्रेष्ठ घैैटेका सहयोगी थिए । घैंटेकै कारण उनको गगन थापासँग कनेक्सन थियो । घैंटे समूहका गुरुङ उनको मृत्युपछि पनि गुण्डागर्दीमै छन् । उनले क्लबहरुमा गएर पैसा माग्दै कुटपिटका घटना त बाहिर आइसकेका छन् । केही घटना बाहिर आए पनि धेरै घटना भने भित्रै गुपचुप बनाइने गरेको छ ।
