आफूलाई प्रधानमन्त्री बनाउन यादवसँग प्रचण्डको गुहार

0

काठमाडौं। नेकपा माओवादी केन्द्रका अध्यक्ष पुष्पकल दाहाल (प्रचण्ड)र जनता समाजवादीका अध्यक्ष उपेन्द्र यादवबीच भेटघाट भएको छ। आज बिहीबार बिहान खुमलटारमा प्रचण्ड र यादवले भेटघाट गर्दै सत्ता समीकरण र समसामयिक राजनीतिकबारे छलफल भएको बताएका छन्।

भेटमा प्रचण्डले यादवसमक्ष आफूलाई प्रधानमन्त्रीमा सहयोग गर्न आग्रह गरेको खुमलटार स्रोतले जनाएको छ। प्रचण्डले सहयोगको अपेक्षा गरेपछि यादवले पार्टीभित्र छलफल गरेर अगाडि बढ्ने आश्वसन दिएका छन्।

पछिल्लो समय आफैं प्रधानमन्त्री बन्ने कसरतमा जुटेका प्रचण्ड सत्ता समीकरण निर्माणको आन्तरिक गृहकार्यलाई तीब्र पारेका छन्। राष्ट्रपति विद्यादेवी भण्डारीले संविधानको धारा ७६(२) बमोजिम प्रधानमन्त्री पदमा दाबी गर्न पुस १० (आइतबार)सम्म समयसीमा दिएकी छन्। बहुमत पुर्‍याउने दलले आइतबार ५ बजेभित्र दाबी पेस गर्नुपर्नेछ। धारा ७६ (१) बमोजिम प्रधानमन्त्री नियुक्ति गर्न कुनै पनि दलले स्पष्ट बहुमत प्राप्त गरेको नदेखिएपछि धारा ७६(२) बमोजिम राष्ट्रपतिले आह्वान गरेकी हुन्।

सत्ता समीकरण निर्माणबारे कांग्रेस र एमालेसँग समेत समानान्तर वार्तामा रहेका माओवादी केन्द्रका अध्यक्ष प्रचण्डले कांग्रेसका सभापति एवं प्रधानमन्त्री शेरबहादुर देउवालाई भेटेर आफूलाई प्रधानमन्त्री बनाउन औपचारिक प्रस्ताव गरेका थिए।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्