वीरगंज/ प्रहरीको सेटिङ्गमा भारतबाट अबैध रुपमा भित्र्याइएको लाखौ मूल्य बराबरको रजनीगन्धा बारा प्रहरीले नियन्त्रणमा लिएको छ ।
शुक्रबार विशेष सूचनाको आधारमा जिल्ला प्रहरी कार्यालय बाराको टोलीले तस्करीको समान बोकी वीरगंज हुँदै गएको ना६ख ५२७८ नम्बरको मालबाहक ट्रक चालक सहित नियन्त्रणमा लिएको हो ।
पर्सा प्रहरीको सेटिङ्गमा वीरगंजबाट बाहिरिएको ट्रकमा लाखौ मूल्य बराबरको तस्करीको गुटखाजन्य बस्तु गैरहेको सूचनाको आधारमा जिल्ला प्रहरी कार्यालय बाराका प्रहरी उपरीक्षक होबिन्द्र बोगटीको आदेशमा खटिएको प्रहरी टोलीले वीरगंज-पथलैया सडकखण्ड अन्तर्गत बाराको जितपुर सिमरा उपमहानगरपालिका वडा १० नितनपुर चौकबाट उक्त नम्बरको ट्रक नियन्त्रणमा लिएको बारा प्रहरीले जनाएको राष्ट्र सन्देशले खबर समाचार प्रकाशन गरेको छ ।
ट्रकका चालक धादिङ बेनिघाट रोराङ्ग गा.पा. वडा नम्बर ५ बस्ने ३५ बर्षिय नकुल परियार सहित नियन्त्रणमा लिएको ट्रकलाई चेकजाँच गर्दा ट्रकभित्र करिब १३ लाख ९९ हजार ८ सय बराबरको रजनीगन्धा, तुलसी लगायत विभिन्न कम्पनीको गुटखा बरामद भएको प्रहरी उपरीक्षक होमेन्द्र बोगटीले बताए ।
गाडीको करिब ३५ लाख र बरामद गरिएको गुटखाको मूल्यगरि ४४ लाख ९९ हजार ८ सय बराबरको मुल्यांकन राखी आवश्यक कार्वाहिको लागि वीरगंज भन्सार कार्यालयमा बुझाइएको उनले बताए ।
वीरगंज देखि मुख्यराजमार्गको पर्सा सिमा भित्र करिब आधा दर्जन प्रहरी चेकप्वाइन्ट छ, तर पनि पर्सा प्रहरीले उक्त ट्रक नियन्त्रणमा लिन नसक्नु प्रहरीको काम कार्वाही प्रति शंका उपशंका उठेको छ ।
हुन त अहिले पर्सा जिल्लाको सदरमुकाम देखि ग्रामिण भेगको नाकासम्म रेकर्ड तोड तस्करी भइरहेको सहज देख्न सकिन्छ । तस्करीको लाइन चालाउन प्रहरी भित्र नै सेण्डिकेट छ । जसले बढी पैसा असुलेर दिन्छ त्यसलाई बढी आम्दनी हुने प्रहरी युनिट, घुमुवा प्रहरी, क्वीआरटोलीको जिम्मा दिने गरेको प्रहरी श्रोतले नै बताउँछ ।
आफ्नो काम कार्वाही प्रति उत्तरदायित्व नभइ जसरी पनि पैसा कमाउने नीति अंगालेर पर्सा जिल्लामा प्रहरी खुलेयाम तस्करी गराइ नेपाल सरकारको अर्बौँको राजश्व चुहावट गरि रहेको छ ।
