काठमाडौं । काठमाडौंको कपन राम मन्दिर नजिकै एउटा घरमा आगलागी हुँदा दुईजनाको मृत्यु भएको छ । आज साँझ आगलागी भएको घरभित्र दुईजनाको शव भेटिएको घटनास्थलमा रहेका एकजना प्रहरी अधिकारीले डिसी नेपाललाई जानकारी दिए ।
प्रहरी अधिकारीले दिएको जानकारी अनुसार उनीहरुको सनाखत हुन बाँकी रहेको छ । आगलागी नियन्त्रणमा आइसकेको र घरको माथिल्लो तलामा भएका नागरिकलाई सकुशल उद्धार गरिएको प्रहरीले जनाएको छ ।
आगो निभाउनका लागि सुरक्षाकर्मी र दमकल परिचालन गरिएको जिल्ला प्रहरी परिसर काठमाडौंले जनाएको छ । आगो लागेको ठाउँबाट विस्फोटको आवाज पनि सुनिएको स्थानीयबासिन्दाले बताएका छन् ।
ट्रेकिङ्ग अफिस र ट्रेकिङ्गमा प्रयोग हुने सामान राखिएको घरमा आगलागी भएको प्रहरीको भनाइ छ ।
यसबारेमा अझै थप विवरण आउन बाँकी छ ।
