काठमाडौं । सशस्त्र प्रहरी बलको एआइजी सिफारिसले नवनियुक्त आइजीपी राजु अर्याललाई शुरुमै धक्का लागेको छ । गृहमन्त्रालयले सशस्त्र प्रहरी बलका डीआईजी नारायणदत्त पौडेललाई मात्रै एआईजी बढुवाका सिफारिस गर्न दबाब दिँदा आइजीपी भएको दुई दिनमै धक्का लागेको हो ।
विगतमा अर्यालसँगै प्रतिस्पर्धी रहेका डिआइजी चन्द्रप्रकाश गौतम (सीपी) लाई छुटाएर एकल रुपमा पौडेललाई मात्रै बढुवा सिफारिस गरिएको छ । मन्त्रालयमा बुधबार साँझ बसेको बढुवा समितिको बैठकले एआईजी बढुवाका लागि सिफारिस पौडेललाई सिफारिस गर्ने निर्णय गरेको थियो ।
सशस्त्रमा रिक्त दुई एआईजी पदमा एक जनाको मात्र बढुवा सिफारिस गरिएको छ । वरियतामा अघि रहेका डीआईजी पौडेललाई मात्रै सिफारिस गर्न गृहमन्त्री बालकृष्ण खाँणले दबाब दिएको स्रोतले जनाएको छ । पौडेलपछिको वरियतामा क्रममा रहेका गौतमलाई एआईजीमा बढुवा सिफारिस नगर्न मन्त्रीले दबाब दिँदा बाध्य भएर एक जनालाई मात्रै सिफारिस गर्नु परेको मन्त्रालय स्रोतले जनाएको छ ।
गृह मन्त्रालयमा बुधबार बसेको बढुवा समितिको बैठकले पौडेललाई एआईजीमा बढुवा गर्न सिफारिस गरेको थियो । पौडेललाई तीन वर्षपछि आइजीपी बनाउने गरी अहिले एआइजी बढुवा गरिएको पनि स्रोतको दाबी छ । एआइजीको बढुवाका लागि चार जना डिआईजीले आवेदन दिएका भएपनि उनीहरु मध्ये एकजनालाई मात्रै सिफारिस गरिएको हो ।
डीआईजी पौडेलसहित गौतम, वंशीराज दाहाल र किशोर प्रधानले एआईजी बढुवाका लागि आवेदन दिएका थिए । त्यसमध्ये गौतम आइजीपीकै दावेदार हुन् । तर उनलाई एआइजीमा पनि बढुवा गरिएन । उनको स्थानमा हाल डिआइजी वंशी दाहालले दाबी गरिरहेका छन् । तत्कालिन सशस्त्र प्रहरी महानिरीक्षक पुष्पराम केसी र अर्का एआईजी रामशरण पौडेलले आइतबार अवकास पाएपछि एआइजीको दुई पद रिक्त भएको थियो ।
केसीको ठाउँमा एआईजीमा बढुवा भएका राजु अर्याललाई सरकारले सशस्त्र प्रहरी महानिरीक्षक नियुक्त गरेको थियो । अर्याल र पौडेलको रिक्त एआईजी पदमा बढुवाको सूचना जारी गर्दा दाहाल र प्रधानले पनि आवेदन हालेका थिए । अब हुने एआइजीका लागि गौतम र दाहाल मध्ये एक जना एआइजी हुनेछन् । अर्याल र पौडेलले १८ चैत २०५४ मा नेपाल प्रहरीमा निरीक्षकका रुपमा सेवा थालेका थिए । तर गौतम उनीहरु भन्दा दुई वर्ष अघि नै भर्ना भएका थिए । नेपाली सेनाबाट सशस्त्रमा प्रवेश गरेका गौतमले २०५२ सालमा सेवा प्रवेश गरेका हुन् । भर्नामा अर्याल र पौडेलभन्दा गौतम दुईवर्ष अघि रहेका छन् ।
