काठमाडौं — नेकपा एमालेको सचिवालय बैठक निर्धारित समयभन्दा दुई घण्टा पछि हुने भएको छ।
बुधबार ललितपुरको च्यासलस्थित पार्टी केन्द्रीय कार्यालयमा दिउँसो १ बजे बस्ने तय भएको बैठक अब दिउँसो ३ बजे सुरु हुने गरी पुनःसमायोजन गरिएको हो। बैठक सारिनुको कारण प्रधानमन्त्री तथा एमाले अध्यक्ष केपी शर्मा ओलीको व्यस्त कार्यतालिका रहेको पार्टी स्रोतले जनाएको छ।
एमाले केन्द्रीय कार्यालयका सचिव डा. भीष्म अधिकारीका अनुसार बैठकमा आगामी विधान महाधिवेशनको तयारी, आयोजनास्थल व्यवस्थापन तथा समसामयिक राजनीतिक परिदृश्यबारे गहन छलफल हुने अपेक्षा गरिएको छ।
पार्टीले आगामी भदौ २० देखि २२ गतेसम्म ललितपुरको गोदावरीस्थित सनराइज सम्मेलन केन्द्रमा विधान महाधिवेशन आयोजना गर्ने निर्णय गरिसकेको छ। सोही तयारीलाई मूर्तरूप दिन सचिवालय बैठक महत्वपूर्ण मानिएको छ।
