चितवन/ चितवनमा शनिबार बिहान बस र इभी माइक्रो बस एकआपसमा ठोक्किँदा सात जनाले ज्यान गुमाएका छन्। पूर्वपश्चिम राजमार्ग अन्तर्गत राप्ती नगरपालिका–३ स्थित घटनास्थलमा दुई सवारी साधन एकआपसमा ठोक्किँदा दुर्घटना भयावह बनेको हो।
जिल्ला प्रशासन कार्यालय चितवनका प्रमुख जिल्ला अधिकारी प्रकाश पौडेलले दुर्घटनामा सात जनाको मृत्यु पुष्टि गरेका छन्। मृतकहरूको सनाखत प्रक्रिया जारी रहेको र शवहरू भरतपुर अस्पतालको शवगृहमा राखिएको जनाइएको छ।
दुर्घटनामा ३१ जना घाइते भएका छन्। तीमध्ये केहीको अवस्था गम्भीर रहेको बताइएको छ। घाइतेहरूको भरतपुर अस्पताल र अन्य नजिकका स्वास्थ्य संस्थाहरूमा उपचार भइरहेको छ।
दुर्घटनाको कारणबारे विस्तृत अनुसन्धान भइरहेको जिल्ला प्रहरी कार्यालय चितवनले जनाएको छ। प्रारम्भिक अनुमान अनुसार तीव्र गतिमा रहेका सवारीसाधन एकआपसमा ठोक्किँदा मानवीय क्षति भएको हुनसक्ने बताइएको छ।
राजमार्गमा आवागमन केही समय प्रभावित भए पनि अहिले यातायात सामान्य बनाइएको छ।
