४ फागुन, काठमाडौं । खोटाङको हलेसी बजारमा आगलागी नियन्त्रणको प्रयास जारी छ ।
आइतबार साँझ एउटा हार्डवेयर पसलबाट निस्किएको आगो छेउमा रहेका दुईवटा टहरा र एउटा पक्की घरमा पनि पुगेको प्रमुख जिल्ला अधिकारी शिव कुमार कार्कीले अनलाइनखबरलाई जानकारी दिए ।
उनका अनुसार दमकल नहुँदा आगलागी नियन्त्रणमा समस्या भएको छ । ‘आगलागी नियन्त्रण भइसकेको छैन, हामी प्रयासमै छौं,’ उनले भने ।
अहिले ट्यांकर र डोजरको सहयोगमा नेपाल प्रहरी, नेपाली सेना, सशस्त्र प्रहरी र स्थानीय युवाहरू मिलेर आगलागी नियन्त्रणको प्रयास भइरहेको उनले बताए ।
‘हार्डवेयर पसल त पूरै सकिसक्यो, लगत्तै त्यसको साइडमा रहेको एउटा पक्की घरमा क्षति भएको छ,’ प्रजिअ कार्कीले भने, ‘साइडका अन्य दुईवटा टहरामा पनि क्षति भएको छ ।’
अहिलेसम्म मानवीय क्षति भएको छैन ।
‘दमकलहरू त छँदैछैन । त्यही भएर नियन्त्रणमा समस्या भएको हो,’ घटनाबारे जानकारी गराउँदै उनले भने, ‘हामी ट्यांकर र थापेको पानीबाट नियन्त्रण गर्ने प्रयास गर्दैछौं ।’
