काठमाडौं । भारतीय गाडी नेपाल प्रवेशका लागि सीमा जोडिएको जिल्लाका भन्सार कार्यालयबाट अनुमति लिनुपर्छ । एकै दिनमा फर्किने गरी बिना शुल्क नजिकको बजारसम्म भारतीय गाडी जान सक्छन् । नेपालतर्फ प्रवेश गरेका भारतीय गाडीले एक दिनभन्दा बढी बसेमा निर्धारित शुल्क तिर्नुपर्छ । नेपालतर्फ प्रवेशका लागि भन्सार कार्यालयमा छुटपूर्जीका लागि गाडी नै लिएर जानुपर्छ ।
नेपालमा सबैभन्दा बढी भारतीय गाडी बीरगंजबाट आउने गर्दछन् । तर बीरगंज भन्सारमा दलालहरुले विनागाडी नै भन्सार कार्यालयमा सेटिङ गरी नेपालतर्फ प्रवेश अनुमति लिने गरेका छन् । भन्सार कार्यालय बीरगंजमा गाडी नै नलगी छुटपूर्जी लिएर नेपालतर्फ गाडी निर्वाध आउने गरेका छन् ।
दलालहरुले भन्सारका कर्मचारीलाई घुस खुवाएर विनागाडी नै प्रवेश अनुमति लिने गरेको स्रोत बताउँछ । २०८१ मंसिर ६ गते स्थानीय ब्यवसायीहरुले गाडी नै नल्याई प्रवेश अनुमति दिने गरिएको र यसले धेरै समस्या आउने गरेको बिषयमा स्थानीय पर्यटन ब्यवसायीहरुले भन्सार कार्यालय बीरगंजका प्रमुख भन्सार प्रशासक दीपक लामिछानेलाई अनुरोध गरेका थिए ।
लामिछानेले गाडी नल्याएसम्म अनुमति नदिने आश्वासन दिए । तर दलालहरुको सेटिङमा भन्सारका कर्मचारीहरुले गाडीबिना नै प्रवेश अनुमति दिइरहेको एक ब्यवसायीले नेपालफेसलाई बताएका छन् । गाडी अनिवार्य रुपमा भन्सार प्रांगणमा ल्याएपछि मात्र भन्सार कार्यालयले नेपाल प्रवेश अनुमति दिनुपर्ने हुन्छ । तर यो ब्यवस्थाबिपरीत विनागाडी नै बिचौलिया अरुण यादव र जीतेन्द्र पटेलले भन्सारका कर्मचारीलाई घुस दिएर छुटपूर्जी लिंदैआएको स्रोत बताउँछ । स्रोतका अनुसार यादव र पटेलले लाग्ने शुल्कभन्दा दोब्बर तेब्बर घुस बुझाएर विनागाडी नै प्रवेश अनुमति लिने गरेका छन् ।
गाडीविना नै छुटपूर्जी दिंदा ती गाडी अपराधजन्य कार्य वा तस्करीमा प्रयोग हुने संभावना भएकाले पनि भौतिक रुपमै हेरेर मात्र अनुमति दिने ब्यवस्था गरिएको हो । तर बिचौलिया यादव र पटेलले भन्सारका कर्मचारी सेटिङ गरी विनागाडी अनुमति लिने गरेका छन् ।
यादव र पटेलले बीरगंजबाट ठोरीको लागि अनुमतिपत्र दिन ४ हजारसम्म घुस दिएर अनुमति लिने गरेको आरोप छ । यादव र पटेलले बर्षौंदेखि भारतीय गाडी भन्सारमा नल्याई नेपाल प्रवेश अनुमति लिने क्रममा भन्सार सेटिङको धन्दा गर्दैआएका छन् । यी बिचौलियाका कारण बीरगंजको बाटो हुँदै काठमाडौंसम्म आउने पर्यटक पनि पनि हैरान हुने गरेका छन् । काकडभित्ता, बिराटनगर, पोखरा जाने पर्यटक उत्तिकै हैरान छन् । गाडी नै नभई कागजको भरमा अनुमति दिने भन्सार कार्यालय बीरगंजका कर्मचारीले गाडीसहित आउने पर्यटकलाई भने अनावश्यक केरकार गर्ने र दुःख दिने गरेको गुनासो छ ।
नियमअनुसार भारतीय नम्बर प्लेटका सवारी साधन ३० किलोमिटरसम्म भन्सार सुविधामा ल्याउन मिल्छ । भारतीय नम्बर प्लेटका कार र जिप प्रयोग गर्नेले दैनिक ४ सय ५२ रुपैयाँ भन्सार शुल्क तिर्नुपर्ने व्यवस्था छ । एक वर्षमा एउटा भारतीय गाडीले ३० दिनभन्दा बढी प्रवेश अनुमति पाउँदैन ।
सीमावर्ती शहरमा हुने अपराधमा भारतीय नम्बर प्लेटका गाडीको प्रयोग हुने गरेका समाचार पनि बारम्बार आउने गरेका छन् । अपराधमा प्रयोग गरिएका भारतीय नम्बर प्लेटका गाडी कानुनी प्रक्रियासमेत पूरा नगरी भित्रने गरेका छन् ।
लागुऔषध ओसारपसारमा प्रायः भारतीय नम्बर प्लेटका मोटरसाइकलको प्रयोग भएका समाचार पनि आइरहन्छन् ।
