काठमाडौं । राष्ट्रिय प्रजातन्त्र पार्टी (राप्रपा) का वरिष्ठ नेता तथा पूर्व उपप्रधानमन्त्री एवं पूर्व परराष्ट्रमन्त्री Kamal Thapa ले प्रधानमन्त्री Balen Shah को सीमा सम्बन्धी अभिव्यक्तिप्रति कडा आपत्ति जनाएका छन्।
सामाजिक सञ्जाल फेसबुकमार्फत प्रतिक्रिया दिँदै थापाले संसदमा जवाफ दिने क्रममा प्रधानमन्त्रीले ‘नेपालले पनि भारतको सीमा मिचेको छ’ भन्ने आशयको अभिव्यक्ति दिएको भन्दै त्यसले देशभर तरङ्ग र आश्चर्य पैदा गरेको बताएका छन्।
थापाले केही स्थानमा नेपाल–भारत सीमा विवादको विषय अलग भए पनि नेपालले भारतको भूमि अतिक्रमण गरेको भन्ने दाबी तथ्यसंगत नभएको उल्लेख गरेका छन्। यदि नेपालले भारतको सीमा मिचेको भन्ने कुरामा प्रधानमन्त्री विश्वस्त छन् भने कुन स्थानमा त्यस्तो अवस्था रहेको हो भन्ने विषय प्रमाणसहित जनतासामु स्पष्ट पार्नुपर्ने उनको माग छ।
उनले नेपाल कुनै पनि छिमेकी मुलुकको भूमि अतिक्रमण नगर्ने राष्ट्रिय मान्यतामा दृढ रहेको उल्लेख गर्दै, यदि वास्तवमै नेपालले कुनै भूभाग अतिक्रमण गरेको प्रमाण छ भने तत्काल गल्ती सच्याएर सम्बन्धित भूमि सम्मानपूर्वक फिर्ता गर्नुपर्ने धारणा राखेका छन्।
थापाले लिम्पियाधुरा, कालापानी, लिपुलेक र सुस्ता लगायतका क्षेत्रमा नेपालको भूमि अतिक्रमण भएको विषयमा देशव्यापी बहस र चिन्ता भइरहेका बेला प्रधानमन्त्रीबाट आएको उक्त अभिव्यक्ति गैरजिम्मेवारपूर्ण भएको टिप्पणी गरेका छन्। उनले नेपालले आफ्नो भूमि अतिक्रमण सहन नसक्ने र राष्ट्रिय सार्वभौमिकता तथा भौगोलिक अखण्डतामाथि कुनै सम्झौता हुन नसक्ने बताएका छन्।
प्रधानमन्त्रीको उक्त भनाइ तत्काल सच्याउन आग्रह गर्दै थापाले देश र जनताले ठूलो भरोसा गरेका नेतृत्वबाट यस्तो प्रकारको मन्तव्य आउनु दुःखद भएको प्रतिक्रिया दिएका छन्।
