संखुवासभा, १२ भदौ ।
ऊर्जा, जलस्रोत तथा सिँचाइ मन्त्री दिपक खड्काले संखुवासभामा पाँच हजार मेगावाट भन्दा बढी विद्युत उत्पादन गर्ने क्षमता रहेको भन्दै सबै राजनीतिक दल एकजुट भएर विकास र समृद्धिको यात्रामा लाग्नुपर्नेमा जोड दिनुभएको छ ।
मादी माध्यमिक विद्यालयको हिरक महोत्सवलाई सम्बोधन गर्दै मन्त्री खड्काले संखुवासभा स्रोत र साधनका हिसाबले मुलुककै सबल र सम्पन्न जिल्लामध्ये एक भएको उल्लेख गर्दै शिक्षा र ऊर्जा दुवै क्षेत्रमा जिल्लाले दिएको योगदान ऐतिहासिक रहेको बताउनुभयो । उहाँले जिल्लाको पहिचानलाई अझ उचाइमा पुर्याउने गरी योगमाया आयुर्वेद विश्वविद्यालय स्थापनासँगै ऊर्जा, पर्यटन र सीमा नाकाको विकासमा पनि समान रूपले ध्यान दिनुपर्ने धारणा राख्नुभयो ।
“संखुवासभामा जलविद्युत मात्रै होइन, मकालु हिमालदेखि अरुण उपत्यका र अन्य प्राकृतिक तथा सांस्कृतिक सम्पदाले पर्यटन विकासको पनि ठूलो सम्भावना बोकेको छ । यस्तो क्षमतामय जिल्लाको विकास दलीय राजनीतिभन्दा माथि उठेर गर्नुपर्छ,” मन्त्री खड्काले भन्नुभयो । उहाँले चीन र भारतलाई जोड्ने किमाथाङ्का नाकाको विकासलाई प्राथमिकतामा राखी सरकार अघि बढिरहेको पनि जानकारी दिनुभयो ।
सोही अवसरमा प्रमुख अतिथि राष्ट्रपति रामचन्द्र पौडेलले पछिल्ला कमजोरी देखाएर व्यवस्थामाथि भ्रम फैलाउने प्रयासविरुद्ध सचेत रहन लोकतान्त्रिक शक्तिलाई आग्रह गर्नुभयो । उहाँले सरकारले सुशासन र सेवा प्रवाहमा विशेष ध्यान दिनुपर्ने आवश्यकता औंल्याउँदै शिक्षा र युवाशक्तिलाई जीवनपयोगी ज्ञानका माध्यमबाट देशमै अवसर सिर्जना गर्नुपर्नेमा जोड दिनुभयो ।
कार्यक्रममा विभिन्न कालखण्डमा विद्यालयका योगदानकारी व्यक्तित्वलाई सम्मान गरिएको थियो ।
