काठमाडौं – राष्ट्रिय प्रजातन्त्र पार्टी (राप्रपा)ले पूर्वप्रधानन्यायाधीश कल्याण श्रेष्ठ वा सुशीला कार्कीको अध्यक्षतामा भिजिट भिसा प्रकरणको छानबिन गर्न न्यायिक आयोग गठन गर्न प्रस्ताव गरेको छ।
बुधबार प्रतिनिधिसभाको बैठकको सुरुवातमा सभामुख देवराज घिमिरेबाट बोल्न अनुमति पाएपछि राप्रपा सांसद दिपकबहादुर सिंहले यस्तो प्रस्ताव राखेका हुन्। सांसद सिंहले भने, “कल्याण श्रेष्ठ वा सुशीला कार्कीको अध्यक्षतामा छानबिन समिति गठन गरौँ। यदि कसैले बदमासी गरेको छ भने त्यसको सजाय पाउनुपर्छ, र नभएकोले कसैलाई असर पर्नु हुँदैन।”
उनले राप्रपाले न्यायिक आयोग गठन नहुँदासम्म संसद् बहिष्कार जारी राख्ने पनि स्पष्ट पारे। “यदि आयोग गठन हुन सकेन भने राप्रपा सांसदहरू बिना भत्ता संसद् बहिष्कार जारी राख्नेछौँ,” उनले थपे।
यसअघि सभामुख घिमिरेले राष्ट्रिय स्वतन्त्र पार्टी (रास्वपा)का सांसद अशोककुमार चौधरीलाई पनि बोल्ने अनुमति दिएका थिए। सांसद चौधरीले पनि संसदीय समिति वा न्यायिक आयोग गठन नभएसम्म रास्वपाले संसद् बहिष्कार गर्ने योजना रहेको बताएका थिए।
