काठमाडौं । आम जनता पार्टी (आजपा)का अध्यक्ष तथा पूर्वमन्त्री प्रभु साहले ‘प्रधानमन्त्रीसँग प्रश्नोत्तर’ कार्यक्रम बहिष्कार गरेका छन् । प्रधानमन्त्रीसँग प्रश्नोत्तर कार्यक्रम औचित्यहीन भएको टिप्पणी गर्दै उनले कार्यक्रम बहिष्कार गर्दै संसद बैठकबाट बाहिरिए ।
आजपा अध्यक्ष तथा सांसद समेत रहेका साहले यसअघिकै प्रश्नोत्तर कार्यक्रममा आफूले सोधेको प्रश्नको जवाफ प्रधानमन्त्री केपी शर्मा ओलीबाट नआएको भन्दै प्रधानमन्त्रीसँग प्रश्नोत्तर कार्यक्रम औचित्यहीन भएको जिकिर गरेका छन् ।
प्रतिनिधि सभाको बिहीबार बसेको बैठकमा बोल्ने क्रममा साहले कार्यसूचीबाटै ‘प्रधानमन्त्रीसँग प्रश्नोत्तर’ कार्यक्रम हटाउन आग्रह गर्दै बहिष्कार गर्ने चेतावनी दिएका थिए ।
गत महिना (४ फागुन)को प्रश्नोत्तर कार्यक्रममा साहले गरेको प्रश्नको जवाफ प्रधानमन्त्री ओलीले दिएका थिएनन् । सोही बिषयमा केन्द्रीत भई साहले प्रश्नकै जवाफ नदिएछि संसद, नियमावलीको अपमान भएको टिप्पणी गर्दै कार्यसूचीबाट हटाउन सुझाव दिए ।
बिहिबार पनि प्रधानमन्त्रीसँग प्रश्नोत्तर कार्यक्रम रहेको थियो । प्रधानमन्त्रीबाट जवाफ नआउनुले सिंगो संसद्, सभामुखको गरिमामा समेत प्रश्न उठेको उनको भनाइ थियो ।
‘आजको कार्यसूचीमा प्रधानमन्त्रीसँग प्रश्नोत्तर कार्यक्रम राखिएको छ । सांसदले सोधेको प्रश्नको जवाफ नै नदिएको औचित्यहिन कार्यक्रम कार्यसूचीबाट हटाइयोस् भन्न ध्यानाकर्षण गर्न चाहन्छु’, सांसद सांसद साहले भने ।
नियमावली र प्रावधानप्रति प्रधानमन्त्री ओली उत्तरदायी नभएको जिकिर गर्दै उनले संसद्को कार्यसूचीबाट हटाउन माग गरेका हुन् ।
‘मैले अस्ति सोधेको प्रश्नको जवाफ सम्माननीय प्रधानमन्त्रीले दिनुभएन । यसरी सवाल प्रभु साहको होइन, प्रश्नोत्तर कार्यक्रमको हो । सम्माननीय सभामुखको गरिमाको हो । नियमावली र प्रावधानको हो’, साहले भने, ‘त्यसप्रति उत्तरदायी सक्नुपथ्र्यो । त्यसैले यो कार्यक्रम कार्यसूचीबाट हटाउन आग्रह गर्छु । यदी हटाइएन भने म बहिष्कार गर्ने जानकारी गराउन चाहन्छु ।’
