– सन्तोष मिश्र
नेपालजस्तो सनातनी मूल्य-मान्यता बोकेको राष्ट्रमा, जहाँ महिलालाई देवीस्वरूप मानिन्छ, त्यहाँ यौन व्यवसायलाई संस्थागत गर्ने र कर उठाउने कल्पना गर्नु कति अमानवीय सोच हो? नेपाली कांग्रेसका प्रमुख सचेतक श्याम घिमिरेले संसदमा यौन व्यवसायलाई वैधता दिई विदेशी पर्यटक भित्र्याउने प्रस्ताव राखेपछि समाजमा तीव्र विरोध उठ्नु स्वाभाविक हो।
तर, यस्तो अपमानजनक प्रस्तावमाथि महिला अधिकारवादीहरू किन मौन छन्? नारी अधिकारका लागि आन्दोलन गर्ने, कानुनी संरक्षणको माग गर्ने, सानो विषयमा सडक तताउने संघ–संस्थाहरू आज किन यसबारे बोलेका छैनन्? जब महिलाको अस्मिता बेच्ने प्रस्ताव आउँछ, तब महिला अधिकारवादीहरू नै मौन बस्नु रहस्यमय छैन र?
नारीको सम्मान बेचेर राष्ट्र चलाउने सोच अस्वीकार्य छ!
नेपालको सभ्य समाजमा, जहाँ नारीलाई आमा, छोरी, दिदी, बहिनीका रूपमा सम्मान गरिन्छ, उनीहरूको शरीर बेचेर कर उठाउने धृष्टता कसरी गर्न सकिन्छ? के आर्थिक उन्नति भन्नुको अर्थ चेलीबेटीलाई यौन बजारको सामान बनाउनु हो?
महिला सशक्तीकरणको नाममा यौन व्यवसायलाई वैधता दिने सोच नारीको आत्मसम्मानमाथि खुला प्रहार हो। नारीलाई देवी मान्ने संस्कृतिमा यस्तो प्रस्तावलाई कसरी स्वीकार गर्न सकिन्छ?
महिला अधिकारकर्मीहरू मौन बस्नुको कारण के हो?
यस्तो घृणित सोचको विरोधमा महिला अधिकारकर्मीहरू किन आवाज उठाइरहेका छैनन्? के विदेशी अनुदान गुम्ने डरले उनीहरू चुप लागेका हुन्? जब विदेशी संस्थाहरूले परियोजना ल्याउँछन्, तब उनीहरू नारी सुरक्षाका मुद्दामा उफ्रिहाल्छन्। तर जब नेपाललाई नै वेश्यालय बनाउन खोज्ने सोच आउँछ, तब किन नारी अधिकारवादीहरू लुकेर बस्छन्?
के महिला अधिकारको ठेक्का लिनेहरू अब बोल्ने कि होइनन्? जब विदेशी अनुदानको प्रवाह रोकिएला भन्ने डर हुन्छ, तब किन महिला अधिकारवादीहरू नै नारी अस्मिताविरुद्ध आँखा चिम्लेर बस्छन्?
संघीयता र गणतन्त्र जोगाउने नाममा नारीको इज्जत बेच्ने सोचको भर्त्सना गरौँ
नेपालको आर्थिक समृद्धि भनेको उद्योग-धन्दा, उत्पादनमुखी अर्थतन्त्र र श्रममै आधारित हुनुपर्छ। आज युवाहरू विदेश जान बाध्य छन्, उद्योग-व्यवसाय धरासायी छन्। सरकारले तिनको व्यवस्थापन गर्ने तर्फ सोच्नु पर्नेमा, महिलाको शरीर बेचेर कर उठाउने नीति ल्याउन प्रस्ताव राख्नु कति लज्जास्पद कुरा हो!
नेपाललाई आर्थिक रुपमा सम्पन्न बनाउने उपाय खोज्नुभन्दा नारी अस्मिता बेचेर विदेशी पर्यटक भित्र्याउने सोच राख्नेहरूसँग हाम्रो सभ्यता कहिल्यै मिल्न सक्दैन। विदेशीकरणको नाममा नेपाली समाजको मूल आत्मालाई समाप्त पार्न खोज्ने, नेपाली नारीलाई सम्मानित स्थानबाट धकेल्ने सोचको घोर विरोध गरौँ।
यौन पर्यटनको नाममा नेपाललाई वेश्यालय बनाउन खोज्ने मानसिकता अस्वीकार्य छ!
नेपाल कुनै व्यापारिक यौन पर्यटनको गन्तव्य होइन। यो सतीदेवीको अंग पतन भएको पवित्र भूमि हो। नारीलाई सम्मान गर्ने देशमा यौन व्यवसायलाई संस्थागत गर्ने प्रस्ताव नै पागलपन हो।
नेपालका नागरिक, राष्ट्रवादी युवा, पत्रकार, बौद्धिक वर्ग सबै एकजुट बनौँ!
यस्तो लज्जास्पद सोचको सबै तह र तप्काबाट कडा विरोध गर्न जरुरी छ। नेपाललाई आर्थिक रुपमा सबल बनाउने हो भने कृषि, उद्योग, व्यापार, नवप्रवर्तन जस्ता उत्पादनशील क्षेत्रलाई अघि बढाउनुपर्छ, न कि महिलालाई वस्तु बनाउने घटिया सोच राख्नुपर्छ।
अब समय आएको छ, जब हामीले देशभक्त नागरिकको रूपमा आफ्नो संस्कृति, सभ्यता र नारी अस्मिताको रक्षाका लागि एकजुट भएर आवाज उठाउनु पर्छ। नेपाल कुनै विदेशी अनुदानमा टिकेको देश होइन, यो सभ्यताको पहिचान बोकेको भूमि हो।
आउनुहोस्, नेपाललाई आर्थिक विकासको सही बाटोमा लैजाऔं, नारी अस्मितामाथि खेलबाड गर्ने सोचलाई जरैबाट नष्ट गरौँ!
