फाइल तस्वीर
२९ फागुन, काठमाडौं । विपक्षी दलहरूले संसद्को सार्वजनिक लेखा समितिको बैठक बोलाउन माग गरेका छन् ।
छलफलका लागि अनेक विषय रहेको तर बैठक नराखेको भनेर विपक्षी दलहरूले सभापति ऋषिकेश पोखरेलको ध्यानाकर्षण गर्दै आएका छन् ।
‘मैले हिजो मात्रै सभापतिसँग कुरा गरेँ र बैठक राख्न भनेको छु । विपक्षी दलहरू बैठक राख्न भनिरहेका छन् तर, सभापतिले बैठक बोलाउनु भएको छैन,’ माओवादी सांसद लेखनाथ दाहालले अनलाइनखबरसँग भने ।
दाहालका अनुसार उनले पोखरा र भैरहवा विमानस्थलको स्थलगत अनुगमन प्रतिवेदनका सम्बन्धमा छलफल राख्न माग गरेका छन् ।
लेखा समितिले पोखरा र भैरहवा विमानस्थलमा भएको भनिएको अनियमितताबारे दुई वटा छुट्टाछुट्टै उपसमिति बनाएर अध्ययन गरिरहेको छ । गत असारमा गठित उपसमितिलाई अध्ययन, अनुगमन र छानबिन गरी रायसहितको प्रतिवेदन पेस गर्न भनिएको छ ।
भैरहवाको गौतमबुद्ध अन्तर्राष्ट्रिय विमानस्थलको अध्ययन–अनुगमनका लागि एमाले सचिव एवं सांसद योगेश भट्टराईको नेतृत्वमा आठ सदस्यीय उपसमिति गठन गरिएको छ ।
उपसमितिमा सांसदहरू अमरेशकुमार सिंह, मनिष झा, अच्युतप्रसाद मैनाली, विक्रम पाण्डे, श्यामकुमार घिमिरे, मञ्जु खाँड र सराज अहमद फारुकी सदस्य छन् ।
पोखरा अन्तर्राष्ट्रिय विमानस्थलको छानबिन गर्न राप्रपा अध्यक्ष एवं सांसद राजेन्द्र लिङदेनको नेतृत्वमा उपसमिति गठन गरिएको छ । उपसमितिमा सांसदहरू अर्जुननरसिंह केसी, गोकुलप्रसाद बाँस्कोटा, जनार्दन शर्मा, प्रेमबहादुर आले, तारा लामा, तेजुलाल चौधरी, दीपक गिरी, देवप्रसाद तिमिल्सिना, रामकृष्ण यादव, रुक्मणि राना र लेखनाथ दाहाल सदस्य छन् ।
उपसमितिले स्थलगत अनुगमन र केही कागजातहरूको अध्ययन गरिसकेको छ ।
यसका अलावा अन्य धेरै विषय रहेको बताउँछन् माओवादी सांसद दाहाल । ‘डेडिकेटेड–ट्रंक लाइनको विषय छ । हामीले बक्यौता उठाउन दिर्नेशन दिनुपर्ने छ,’ उनले भने ।
समितिमा रहेका उजुरीउपर समेत छलफल आवश्यक रहेको उनले बताए । लेखा समितिको सचिवालयका अनुसार समितिमा १०० भन्दा धेरै उजुरी रहेका छन् ।
