ललितपुर । अन्तर्राष्ट्रिय स्तरमा ख्याति कमाएका नेपाली ब्लुज कलाकार अशेष डंगोल (हिमालयन हेन्ड्रिक्स) को अगुवाइमा टुगेदर फर नेपाल द्वारा शारीरिक रूपमा अशक्त व्यक्तिहरूको सहयोगार्थ आयोजित च्यारिटी कन्सर्ट सम्पन्न भएको छ।
शनिबार, फागुन ३ गते ललितपुरको झम्सिखेलस्थित मोक्ष ज्ञान मण्डला मा आयोजित कार्यक्रममा विविध सांस्कृतिक प्रस्तुति समेटिएको थियो। उद्घाटन समारोहमा प्रेशानी भट्टराई एण्ड डिजएबल सर्भिस संस्थाकी गीता भुजेलले “हा लाउँछ नि माया लौन नि”, भने निर्मला तामाङले “कम्मर भाँचौं डम्फुको तालैमा” गीतमा नृत्य प्रस्तुत गरे।
कन्सर्टमा अशेष डंगोललाई विकास श्रेष्ठ (बेस गिटार), नितिन राना (ड्रम्स), सुरोजल र सरनिल महर्जन (धिमे, खिँ, भुस्या) बाजाले साथ दिएका थिए। कार्यक्रममा डंगोलले आफ्ना चर्चित गीतहरू “इन सर्च टुवर्ड्स फ्रिडम”, “जात्रा भाइब”, “काठमाडौं भाइब” तथा नयाँ गीतहरू “रिङरोड पारि मेरो बाजेको घर छ” र “गाउँबाटै घरैबाटै” प्रस्तुत गरे।
टुगेदर फर नेपाल को आयोजनामा सम्पन्न यो कार्यक्रममार्फत डिजएबल सर्भिस सेन्टर, बालाजु, र ब्राइट स्टार सोसाइटी, बागबजार लाई आर्थिक तथा अन्य प्रकारका सहयोग प्रदान गरिएको आयोजकले जनाएको छ।
