२० माघ, काठमाडौं । आगामी चुनावमा एक्लै बहुमत ल्याउने लक्ष्य राखेर ‘मिसन–८४’ भनिरहेको नेकपा एमाले यतिबेला वडाकेन्द्रित अभियानमा जुटेको छ । उक्त अभियानलाई एमालेले ‘जरा अभियान’ भनेको छ । २०७९ मंसिरको चुनावमा अपेक्षित नतिजा नआएपछि एमालेले मिसन–०८४ अभियान थालेको थियो ।

सुरुमा एमालेले दुई महिने मिसन ग्रासरुट अभियान चलाएको थियो । सम्पूर्ण पार्टी पंक्ति परिचालन गरी २०८० वैशाखसम्म सञ्चालित तीन महिने मिसन ग्रासरुट अभियानबाट एमालेले पार्टीको कमजोरी पहिचान गरेको थियो ।

उक्त मिसन ग्रासरुट अभियानको समीक्षाका आधारमा एक वर्षे सुदृढीकरण कार्यक्रम सञ्चालन गर्‍यो । २०८० सालभर सञ्चालित एक वर्षे अभियान अन्तर्गत एमालेले मध्यपहाडी लोकमार्ग केन्द्रीय संकल्प अभियान चलायो । यही अवधिमा प्रदेश, जिल्ला र जनसंगठनहरूको अधिवेशन गरी नेतृत्व परिवर्तन गरेको थियो ।

अहिले वडाकेन्द्रित अभियान सञ्चालन गरिरहेको छ । यो अभियान आगामी १५ वैशाखसम्म सकिने छ ।

जनसंगठन समन्वय संयन्त्रका प्रमुख भानुभक्त ढकालका अनुसार यो अभियानमा मूलतः तीन विधिबमोजिम काम भइरहेको छ– पार्टी मोर्चा, जनसंगठन र जनप्रतिनिधि । अभियानको मूल नेतृत्व पार्टीकै नेताहरूले गरिरहेका छन् । जसअनुसार सबै प्रदेश कमिटीले प्रशिक्षण/भेला कार्यक्रम गरिसकेका छन् ।

बागमती प्रदेश कमिटी उपसचिव भक्तकुमारी लामाका अनुसार अहिले जिल्ला तहको अभिमुखीकरण चलिरहेको छ । ‘हामी जिल्ला तहको अभिमुखीकरण गरिरहेका छौं । जरा अभियानमा हामीले गर्नुपर्ने कामबारे अभिमुखीकरणमा हुन्छ,’ उनले भनिन् ।

बागमती प्रदेशले ‘पार्टीसँग जेनजी’ (युवा लक्षित), ‘आमासँग अनेम संघ’ र ‘जनतासँग जनसंगठन’ नारासहित वडा अभियान सञ्चालन गर्ने लामाले बताइन् । बागमतीले जसरी नै अरु प्रदेशहरूले पनि आ–आफ्ना हिसाबले यो अभियानमा नेताहरू परिचालित गरिरहेका छन् ।

स्थायी कमिटी सदस्य ढकालका अनुसार प्रदेश कमिटीभन्दा माथिका नेताहरूलाई भने अभियानबारे जानकारी भइसकेको छ । गत वैशाखसम्म सम्पन्न महाधिवेशन प्रतिनिधि परिषद् बैठकबाट जनतासम्म जानुपर्ने नीति पारित गरेपछि सोही अनुसार एमाले पार्टी केन्द्रले जरा अभियानको प्रस्ताव ल्याएको थियो ।

केन्द्रीय कमिटीबाट त्यो प्रस्ताव पारित भएपछि तीन महिने अभियान अगाडि बढाइयो । कस्तो कार्यक्रम बनाउने भन्ने निक्र्योल भने गत ३० मंसिरमा देशभरका जिल्ला नेतृत्व समेत सामेल भेलाबाट भएको थियो ।

केन्द्रीय संगठन विभागको आयोजनामा सम्पन्न त्यो भेलामा पार्टीका प्रदेश पदाधिकारी, जिल्ला अध्यक्ष र संगठन विभाग प्रमुख अनि जनसंगठनका केन्द्रीय नेतृत्व सामेल थिए । उनीहरूले जरा अभियानका कार्यक्रम तय गरेको थियो ।

जसअनुसार पालिका र वडा अधिवेशन गरेर नयाँ नेतृत्व स्थापित गर्ने, कमिटी बनाउँदा युवालाई कम्तीमा एक तिहाइ समेट्ने, पार्टी सदस्यता विस्तार र नवीकरण गर्ने जस्ता कामहरू अगाडि बढाइएका छन् । पार्टीसँग जनसंगठनहरूले सहकार्य गरिरहेका छन् ।

‘जनसंगठनमार्फत विभिन्न पेसा र व्यावसायमा रहेका गैरएमाले पंक्तिलाई एमालेको नजिक ल्याउने काम यो अभियानमा हुन्छ,’ स्थायी कमिटी सदस्य ढकालले भने, ‘सँगसँगै आफ्नो क्षेत्र/वर्गको नेता संगठनको रुपमा स्थापित हुनेगरी अभियानकै क्रममा काम हुनेछ ।’ जरा अभियान कार्यान्वयनको क्रममा कतिपय प्रदेशहरूले जनसंगठन परिचालनको नारा ‘जनतासँग जनसंगठन’ भनेका छन् ।

जरा अभियानमा भइरहेको तेस्रो काम जनप्रतिनिधिसँग जोडिन्छ । एमालेले नेतृत्व गरिरहेको संघ, प्रदेश र स्थानीय सरकारले गरेका कामहरूको प्रचार अभियानका क्रममा हुनेछ ।

‘सरकारले गरेका राम्रा कामहरू जनतासम्म पुर्‍याउने र जनताको सुझाव संकलन गरेर समृद्धिको कार्यक्रम तयार गर्छौं,’ ढकालले भने । तीन वटै तहमा रहेर जनताको हितमा एमालेले काम गरिरहेकाले त्यसको प्रचारमा पनि पार्टीपंक्ति परिचालित हुने उनले बताए ।

तर, अभियानका क्रममा हुने महत्वपूर्ण काम भने जनतासँग एमालेलाई अझ कसिलो गरी जोड्नु रहेको ढकाल बताउँछन् । ‘यो अभियानमा एमालेले जनताबाट सिक्ने र जनतालाई सिकाउने नीति कार्यान्वयन गर्नेछ,’ उनी भन्छन् ।