काठमाडौं । पूर्व मिस इक्वेडर प्रतियोगी ल्यान्डी पारागा गोयबुरोको दिनदहाडै गोली हानी हत्या गरिएको छ । सन् २०२२ को मिस इक्वेडर प्रतियोगितामा भाग लिएकी २३ वर्षीया ल्यान्डी पारागा गोयबुरोको अप्रिल २८ मा क्वेभेडो सहरको एक रेष्टुरेन्टमा हत्या भएको थियो ।
टेलिग्राफ पत्रिकाको रिपोर्टका अनुसार उनी एक विवाहमा सहभागी हुन सहर आएकी थिइन् । गोयाबुरोको लागुऔषध तस्कर लिआन्ड्रो नोरोरोसँग सम्बन्ध रहेको भनिएको छ, जसको एक वर्षभन्दा अघि जेलमा दंगा हुँदा मृत्यु भएको थियो।
स्थानीय सञ्चारमाध्यममा हुने अनुमानका बीच प्रहरीले गोयाबुरोको हत्यामा कसैले सुपारी दिएकोको हुनसक्ने गरी अनुसन्धान गरिरहेको छ । गोयबुरोको नाम भ्रष्टाचार अनुसन्धानमा पनि आएको थियो जसले न्यायिक अधिकारीहरूलाई संगठित अपराधसँग जोडेको थियो । आफ्नो मृत्यु हुनुभन्दा केही मिनेटअघि ब्यूटी क्वीनले रेस्टुरेन्टमा खाना खाइरहेको फोटो पोस्ट गरेकी थिइन् ।
गोयबुरोले रेष्टुरेन्टमा पुग्दा आफ्नो फोनको लोकेशन अन गरेकी थिइन् र त्यहीँबाट उनले सामाजिक सञ्जालमा आफ्नो तस्बिर सेयर गर्न थालिन् । यसपछि गुण्डाले उनको स्थान थाहा पाएर रेस्टुरेन्टमा पुगेर ब्यूटी क्वीनको घटनास्थलमै हत्या गरेका थिए ।
गोली प्रहारको घटना सीसीटीभीमा कैद भएको छ । जसमा रेष्टुरेन्टमा बसेर गोयबुरो एक व्यक्तिसँग कुरा गरिरहेको देखिन्छ र यसै क्रममा दुई बन्दुकधारी रेस्टुरेन्ट भित्र पसे, जसमध्ये एक प्रवेशद्वारमा उभिए । दोस्रो बन्दुकधारी गोयबुरोतर्फ दौडन्छ र उनलाई गोली हान्छ। गोली लागेर गोयाबुरो र उनीसँग कुरा गरिरहेका व्यक्ति दुवै घाइते भएका छन्। त्यसपछि दुवै अभियुक्त घटनास्थलबाट फरार छन् ।
गोयाबुरोलाई तीन पटक गोली लागेको र मृत्यु भएको बताइएको छ। टेलिग्राफ अखबारले रिपोर्ट गरेअनुसार अन्वेषकहरूले नोरोरोको फोनमा गोयबुरोका तस्बिरहरू फेला पारेका थिए, साथै उनले गोयबुरोलाई दिएका कारहरूलगायत भव्य उपहारहरूका प्रमाणहरू पनि फेला पारेका थिए। द न्यूयोर्क पोस्टको रिपोर्ट अनुसार, गोयबुरो डिसेम्बर २०२३ मा चर्चामा आइन् जब उनको नाम नोरोरो र उनको एकाउन्टेन्ट हलिभ एङ्गुलो बीचको च्याटमा देखा पर्यो।
अदालतको सुनुवाइका क्रममा अभियोजकहरूले खुलासा गरेअनुसार मारिएका लागूऔषध तस्करले लेखापाललाई ब्यूटी क्वीनसँगको आफ्नो अफेयर खुलाउन नदिन अनुरोध गरेर भनेका थिए, “यदि मेरी श्रीमतीले उनको (गोयबुरो) बारे केहि थाहा पाइन् भने म बर्बाद हुनेछु।” हाल प्रहरीले गोयबुरोको हत्याको अनुसन्धान थालेको छ भने अहिलेसम्म कसैलाई पक्राउ गर्न सकेको छैन ।
ल्यान्डी पररागा गोयबुरो एक दिनअघि विवाहमा सहभागी हुन आएकी थिइन् । उनी रेष्टुरेन्टमा पुगेपछि त्यहाँ आएका एक गुण्डाले उनलाई गोली हानेका थिए । यो आक्रमणको कारण के थियो भन्ने अहिलेसम्म खुल्न सकेको छैन ।
