काठमाडौँ/वैदेशिक रोजगारको लागी विदेश पठाइदिन्छु भनेर करोडौँ रकम ठगी गर्ने गिरोहको समूहलाई प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालयको टोलीले विदेश पठाइदिने बहानामा ठगी गरेको आरोपमा ६ जनालाई पक्राउ गरेको हो।
प्रहरीका अनुसार उनिहरुले न्युजिल्यान्ड, रोमानिया, थाइल्यान्डलगायत मुलुकमा पठाउने नाममा ठगी गर्दै आएको पाइएको छ । पक्राउ परेकाहरूलाई कार्यालयले मंगलबार पत्रकार सम्मेलन गरेर सार्वजनिक समेत गरेको छ।
धादिङका रमेश बयलकोटी यस गिरोहका मुख्य अभियुक्त रहेको पहरीको भनाइ छ। प्रहरीका अनुसार यो गिरोहले ४२२ जनासँग ३ करोडभन्दा बढी ठगी गरेको पाइएको छ ।
भिसा प्लस कन्सल्टेन्सीका नाममा ठगी धन्दा चलाउँदै आएको गिरोहले न्युजिल्यान्ड पठाउने नाममा जनही १७ तथा रोमानिया पठाउने नाममा ७ लाखसम्म ठगी गर्ने गरेको पाइएको प्रहरीले जनाएको छ।
