काठमाडौँ/बाराको सिम्रौनगढ नगरपालिकाका तत्कालीन प्रशासकीय अधिकृतसहित तीनजनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा चलाएको छ।
अख्तियारले तत्कालीन प्रमुख प्रशासकीय अधिकृत विश्वराज मरासिनीसहित लेखा अधिकृत सर्मेन्द्रप्रसाद चौधरी र जिन्सी शाखा प्रमुख सुरेशप्रसाद यादवविरुद्ध मुद्दा चलाएको हो।
तीनैजनाविरुद्ध एक लाख ९९ हजार ८९७ रुपैयाँ बिगो दाबीसहित भ्रष्टाचार मुद्दा चलाइएको हो।
आर्थिक वर्ष २०७६/०७७ मा जिन्सी व्यवस्थापनको केन्द्रीय प्रणालीको सफ्टवेयर खरिद तथा जडान कार्यका लागि उनीहरूले १ लाख ९९ हजार ८९७ बजेट स्वीकृत गराएर सफ्टवेयर खरिद गरेका थिए।
उक्त सफ्टवेयर प्रयोग नगरी सरकारी सम्पत्ति हानी-नोक्सानी गरेको आरोप उनीहरूमाथि लागेको हो।
अख्तियारले उनीहरूविरुद्ध बुधबार विशेष अदालतमा आरोपपत्र दर्ता गरेको छ।
भ्रष्टाचार निवारण ऐन, २०५९ को दफा ८ को उपदफा (३) बमोजिम उनीहरूमाथि आरोपपत्र दर्ता गरिएको हो।
