काठमाडौँ। आगामी फागुनमा हुने राष्ट्रपतिको निर्वाचनमा नेपाली कांग्रेसले पनि उम्मेदवारी दिने निर्णय गरेको छ ।
आज (सोमबार) बसेको कांग्रेस पदाधिकारीको बैठकले सो निर्णय गरेको हो । सभापति शेरबहादुर देउवाको निवास धुम्बाराहीमा बसेको बैठकमा पार्टीका पूर्वपदाधिकारी समेत सहभागी थिए । राष्ट्रपतिमा उम्मेदवारी दिने र यसका लागि अरू दलहरूसँग पनि संवाद अघि बढाउने निर्णय बैठकले गरेकाे कांग्रेस नेता शशांक काेइरालाले जानकारी दिए । नेता काेइरालाले भने, कांग्रेसले राष्ट्रपतिमा उम्मेदवारी दिन्छ । राष्ट्रपतिमा सबै दलको सहयोग लिएर अगाडि बढ्ने निर्णय भयो ।’
राष्ट्रपतिमा उम्मेदवारी दिने निर्णय गरिए पनि उम्मेदवार कसलाई बनाउने भन्नेबारे टुंगो लागिसकेको छैन । कांग्रेसले आफू सरकारमा नभए पनि राष्ट्रपतिमा भने दाबी गर्दै आएको छ ।
संसदको सबैभन्दा ठूलो दल भए पनि आफ्नो नेतृत्वमा सरकार बनाउन नसकेको कांग्रेसले प्रधानमन्त्री पुष्पकमल दाहाललाई भने विश्वासको मत दिएको थियो ।
