चन्द्रसूर्य समाचारदाता/
काठमाण्डौ, ५ असोज/
इन्द्रजात्रामा सहभागि हुन आउने क्रममा राष्ट्रपति विद्यादेवी भण्डारीलाई कालो झण्डा देखाएको आरोपमा पक्राउ परेका शिवसेना नेपालका केन्द्रिय अध्यक्ष अनिल बस्नेतसहितका राष्ट्रवादी अभियन्ताहरू रिहा भएका छन् ।
पक्राउ परेका १० जनासँग जनही पाँच सय रुपैयाँ धरौटी लिई जिल्ला प्रशासन कार्यालय काठमाण्डौले आइतवार रिहा गरेको शिव सेना नेपालले जनाएको छ ।
प्रहरीले अभद्र व्यवहारमा जिल्ला प्रशासन कार्यालयबाट म्याद लिएर उनीहरुलाई हिरासतमा राखेको थियो । इन्द्रजात्रामा बसन्तपुर आउन लागेकी राष्ट्रपतिबिरुद्ध प्रदर्शन गर्ने तयारीमा रहेको भन्दै उनीहरुलाई प्रहरीले पक्राउ गरेपछि देशभरका हिन्दूवादी राष्ट्रवादी संघसंगठनले शान्तिपूर्ण विरोध प्रदर्शन गरी विना शर्त रिहाइकालागि आवाज उठाइरहेका थिए ।
पक्राउ पर्नेमा शिव सेना नेपालका अध्यक्ष अनिल बस्नेत ‘बाबा’, रवीन्द्र कार्की ‘डब्बु’, मानव सेवक, रघुराज राजभण्डारी हरिनारायण साहलगायत थिए ।
रिहा भएलगत्तै शिव सेना बस्नेतले राष्ट्रियता, धर्म र जनताको हितकालागि गरिने आन्दोलनमा राज्यपक्षबाट गरिएको गिरफ्तारीले आफूहरूलाई थप हौसला र बल मिलेको भन्दै आगामी दिनमा पनि आफूहरूको राष्ट्रिय हितसम्बन्धी अभियान जारी रहने दाबी गरे ।
फोटो श्रोतः मणिराज सत्याल, वर्षा शाह
