धनगढी- कैलालीको धनगढी उपमहानगरपालिका–५ स्थित सत्कार चोक नजिक डेरा गरी बस्दै आएका एक भारतीय नागरिकलाई कटुवा पेस्तोल तथा विभिन्न शंकास्पद सामानसहित प्रहरीले पक्राउ गरेको छ।
पक्राउ पर्नेमा भारत घर भई हाल सत्कार चोक क्षेत्रमा बसोबास गर्दै आएका २४ वर्षीय साहिल खान रहेका छन्।
विशेष सूचनाको आधारमा मंगलबार राति करिब १०:२५ बजे प्रहरीले खानको डेरा कोठामा चेकजाँच गरेको थियो। सो क्रममा उनको कोठाबाट एक थान कटुवा पेस्तोल, एक थान रेन्च, एक थान चाँदीको करुवा, चाँदीजस्तो देखिने घाँटीमा लगाउने दुई थान माला, दुई थान टर्चलाइट, एक थान फलामको रड, एक थान डिजिटल काटा तथा एक थान खुकुरी बरामद गरिएको प्रहरीले जनाएको छ।
बरामद सामानसहित पक्राउ परेका खानलाई जिल्ला प्रहरी कार्यालय कैलालीको हिरासतमा राखी थप अनुसन्धान भइरहेको प्रहरीले जनाएको छ।
