काठमाडौं/बौद्ध गुम्बाहरूभित्र हातहतियार लुकाएर राखिएको भन्ने दाबी सार्वजनिकरूपमा फैलिन थालेपछि नेपाल हिन्दू समाजले ती आरोपहरूलाई आधारहीन र समुदायबीच फाटो फैलाउने प्रकारको हल्ला भन्दै तत्काल बन्द गर्न आग्रह गरेको छ। समाजले पवित्र धार्मिकस्थलहरूमाथि संगीन आरोप लगाइँदा बौद्ध धर्मावलम्बीको आस्था मात्रै होइन, हिन्दू–बौद्धबीच सदियौँदेखि कायम मेलमिलाप र सद्भावमै चोट पुगेको जनाएको हो।
पत्रकार सम्मेलनमार्फत हिन्दू समाजले बुद्ध जन्मेको देश नेपाललाई विश्वले बौद्ध शिक्षाको केन्द्रको रूपमा सम्मान गर्दै आएको बताउँदै, त्यही पवित्रतामाथि शंका उत्पन्न गर्ने खालका टिप्पणीहरू अत्यन्त दुःखद र उत्तेजक भएको মন্তব্য गरेको छ। समाजले गुम्बाभित्र हतियार राखिएको आरोपलाई कपोलकल्पित, मनगढन्त र अवाञ्छित विवाद सिर्जना गर्ने प्रयासका रूपमा लिएर कडा शब्दमा खण्डन गरेको छ।
विज्ञप्तिमा आरोप लगाउने व्यक्तिहरूलाई खुला चुनौती दिँदै समाजले भनिएको छ कि उक्त दाबी सत्य हो भन्ने प्रमाण भए तत्काल सार्वजनिक गर्नुपर्छ। प्रमाणित खण्डमा समाज स्वयं बौद्ध गुरुहरूसँग मिलेर सम्बद्ध गुम्बामाथि आवश्यक कारबाही गर्न नेपाल सरकारसँग अनुरोध गर्नेछ। तर यदि कुनै प्रमाणबिना हल्ला, अनुमान र व्यक्तिगत विचारका आधारमा यस्ता संवेदनशील टिप्पणी गरिएको हो भने आरोप लगाउनेले सार्वजनिक रूपमा माफी मागेर गल्ती सच्याउनुपर्ने समाजको माग छ।
समाजले गुम्बाहरूमा प्रवेशका आफ्नै नियम, विधि र आचारसंहिता हुने भएकाले साधना, दीक्षा, अध्ययन वा ध्यानका लागि गुम्बाका ढोका सधैं खुला रहने तर अनावश्यक होहल्ला, भीडभाड र अव्यवस्थित क्रियाकलाप निषेध हुने स्पष्ट उल्लेख गरेको छ। यसलाई ‘रहस्यमय’ भन्दै गलत अर्थ निकाल्नेहरूले नै भ्रम र अशुद्ध सूचना फैलाइरहेको समाजको आरोप छ।
समाजले अन्त्यमा भनेको छ कि यस्ता हल्ला निरन्तर चलिरहेमा बौद्ध गुरुहरूसँगको समन्वयमा हिन्दू समाज स्वयं कानूनी कदम अघि बढाउन बाध्य हुनेछ।
