२१ फागुन, काठमाडौं । आगामी दुई संस्करणको फिफा विश्वकपको फाइनल खेलमा हाफ टाइम शो हुने भएको छ । फिफा अध्यक्ष जियानी ईन्फाटिनोले विश्वकप फाइनल खेलमा हाफ टाइम शो हुने पुष्टि गरेका हुन् ।
फिफा विश्वकप इतिहासमा पहिलोपटक हाफ टाइम शो हुन लागेको हो । सुपर बाउल स्टाइलको यस हाफ टाइम शोका लागि चर्चित ब्यान्ड कोल्डप्लेले कलाकारहरू निर्धारण गर्नेछ ।
सन् २०२६ को फिफा विश्वकप फुटबल अमेरिका, क्यानडा र मेक्सिकोले संयुक्त रूपमा आयोजना गर्दै छन् भने फाइनल खेल १९ जुलाइमा न्यु जर्सीको मेटलाइफ स्टेडियममा हुनेछ।
च्याम्पियन्स लिगजस्ता प्रतियोगिताहरूको फाइनलमा प्रि-म्याच प्रदर्शनहरू सामान्यजस्तै भइसकेका छन्, तर विश्वकप फाइनलमा भने कहिल्यै हाफ-टाइम शो भएको छैन।
इन्फान्टिनोका अनुसार फाइनल खेलको हाफटाइमका दौरान करिब १५ मिनेटको शो का लागि कोल्डप्लेका प्रमुख गायक क्रिस मार्टिन र ब्यान्ड प्रबन्धक फिल हार्वेले कलाकारहरूको सेट स्थापना गर्न मद्दत गर्नेछन्।
