१० माघ, काठमाडौं । नेपाल खेलकुद पत्रकार मञ्चको आयोजनामा हरेक वर्ष हुँदै आएको एनएसजेएफ कप फुटसल प्रतियोगिताको चौथो संस्करणमा रिपोर्टर राइनोज च्याम्पियन भएको छ ।
नखिपोटस्थिट फुटसल भिलेजमा बिहीबार भएको फाइनलमा रिपोर्टर राइनोजले हेडलाइन हुरिकेन्सलाई ४–० ले पराजित गर्दै उपाधि जितेको हो । सबै गोल टिमका मार्की अभिनव जोशी एक्लैले गरे ।
चार टिम सम्मिलित एनएसजेएफ कपमा रिपोर्टर, हेडलाइन र बाइलाइन ब्यान्डिजले समान २ खेल जितेका थिए । बाइलाइनलाई गोलअन्तरमा उछिन्दै सुवास हुमागाईं मार्की रहेको हेडलाइनले फाइनल पक्का गरेको थियो ।
रिपोर्टरले लिग चरणमा पनि हेडलाइनलाई ५–२ ले हराएको थियो । अन्तिम लिग खेलमा बाइलाइनसँग हारे पनि रिपोर्टर फाइनल पुगेको हो । फिचर फ्यान्टमसले तीनै खेलमा पराजय भोगेको थियो ।
अभिनव कुल ११ गोल गर्दै उत्कृष्ट खेलाडी बने । इमर्जिङ प्लेयरमा शिशिर बस्नेत र उत्कृष्ट गोलरक्षकमा हेडलाइनका सुजल थापा चुनिए ।
