सांसद गौतमको : “प्रधानमन्त्रीसँग गएका फर्किएनन् भनेको हैन, तर फर्किन नचाहने होडबाजीको तथ्य छ”
काठमाडौं — राष्ट्रिय स्वतन्त्र पार्टी (रास्वपा) की सांसद सोविता गौतमले प्रधानमन्त्री सहभागी भएको एक अन्तर्राष्ट्रिय कार्यक्रममा सहभागी भएर फर्किन नचाहने नेपालीहरूको विषयमा आफूले उठाएको प्रसंगलाई तोडमोड गरिएको भन्दै स्पष्टिकरण दिएकी छन्। बुधबार प्रतिनिधिसभाको बैठकमा बोल्दै उनले संसदमा बोलेको कुरालाई गलत ढंगले व्याख्या गर्ने प्रयासप्रति आपत्ति जनाउँदै सरकारको गैरजिम्मेवारीपूर्ण व्यवहारको कडा आलोचना गरिन्।
उनका अनुसार स्पेनमा आयोजित एक ठूलो अन्तर्राष्ट्रिय कार्यक्रममा प्रधानमन्त्री केपी शर्मा ओलीको नेतृत्वमा आधिकारिक प्रतिनिधिमण्डल सहभागी भएर नेपाल फर्किसकेको भए पनि, सोही कार्यक्रममा सहभागीका रूपमा सयौं नेपाली विदेशमै अलप भएका तथ्यहरू सार्वजनिक भइरहेका छन्। सांसद गौतमको भनाइ थियो, “प्रधानमन्त्रीको टोली फर्किएको हो, तर कार्यक्रमकै बहानामा गएकामध्ये केही नेपाली उतै बसेको यथार्थ पनि छ। यो लुकाउने कुरा होइन।”
उनले नेपाली नागरिकलाई फेक कागजातमार्फत भिसा दिलाएर युरोपतर्फ पठाउने गिरोह सक्रिय भएको विषयमा पनि संसदमा गम्भीर ध्यानाकर्षण गराएकी थिइन्। “भिजिट भिसाको नाममा भइरहेको मानव तस्करीबारे गम्भीर अनुसन्धान आवश्यक छ,” उनले भनिन्, “तर सरकारले यस्तो संवेदनशील विषयलाई सामान्य प्रशासनिक समिति बनाएर टार्ने कोशिश गरेको छ, जुन निन्दनीय छ।”
सांसद गौतमले विशेष छानबिन समिति गठनको माग गर्दै सरकारको निष्क्रियताप्रति प्रश्न उठाइन्। उनले भनिन्, “सरकारले नागरिक बेचबिखन जस्तो गम्भीर विषयमा स्वार्थसँग जोडिएका र निष्पक्षता गुमाएका पात्रहरूको संयोजकत्वमा समिति बनाएको छ, जसको औचित्य नै छैन। रास्वपाको संसद बहिष्कार त्यही विरोधको रूप हो।”
प्रधानमन्त्रीको सचिवालयबाट आएको आपत्तिपछि सांसद गौतमले आफ्नो भनाइलाई लिएर स्पष्ट पृष्ठभूमि पनि प्रस्तुत गरिन्। उनले भनिन्, “मैले भनेको वाक्य फेरि दोहोर्याउँछु — सम्माननीय प्रधानमन्त्री जानुभएको स्पेनको कार्यक्रममा सहभागी भएकामध्ये केही नेपाली उतै बसेको भन्ने समाचारहरू आइरहेका छन्। मैले प्रधानमन्त्रीसँगै गएकाहरू फर्किएनन् भनेर भनेकी छैन।”
उनले संसदमा उठाएका विषय हटाउन माग गरिएकोप्रति कडा असन्तोष जनाउँदै नेपाली भाषाको सही अर्थ नबुझेर आफूलाई आरोपित गरिएको गुनासो गरिन्। “प्रधानमन्त्रीको कार्यक्रममा कोही फर्किएनन् भन्नु र प्रधानमन्त्रीसँगै गएका फर्किएनन् भन्नुमा ठूलो भिन्नता छ,” उनले प्रस्ट पारिन्, “नेपाली भाषा बुझ्न नसकेर सांसदका भनाइ हटाउनुपर्ने माग गर्नु संसदको गरिमामाथि आघात हो।”
गौतमले अन्त्यमा भनिन्, “म जे बोलेकी छु, त्यसमा स्पष्टता छ। न तथ्यबाट पछाडि हट्छु, न दबाबमा झुक्छु। जसलाई समस्या छ, उसले पहिले आत्मपरीक्षण गरोस्।”
