१८ चैत, काठमाडौं । अवैध आप्रवासनको खतरासँग जुझ्न बेलायतमा दुई दिने अन्तर्राष्ट्रिय सम्मेलन आयोजना हुने भएको छ । बीबीसीका अनुसार सम्मेलनमा ४० भन्दा बढी देशका प्रतिनिधिहरू सहभागी हुनेछन्।
सम्मेलनमा बेलायतका प्रधानमन्त्री किएर स्टार्मरले मानव तस्करी गर्ने गिरोहहरू रोक्न र राष्ट्रहरूबीच आपसी सहयोग बढाउन विशेष जोड दिनेछन्।
सोमबारबाट सुरु हुने यो सम्मेलन यो एजेन्डामा गर्न लागिएको पहिलो सम्मेलन मानिएको छ। यसको उद्देश्य अवैध आप्रवासन समाधान गर्ने उपाय खोज्नु र अन्तर्राष्ट्रिय सहकार्यलाई सुदृढ बनाउनु रहेको आयोजकले जनाएका छन् ।
आप्रवासनको मुद्दा बेलायती सरकारका लागि अत्यन्तै महत्वपूर्ण विषय बनेको छ।
विपक्षी कन्जरभेटिभ पार्टी र रिफर्म यूकेले सत्तारूढ लेबर पार्टीलाई यो समस्यासँग उचित रूपमा सामना गर्न नसकेको आरोप लगाएका छन्।
सम्मेलन सुरु हुनुअघि बेलायती सरकारले मानव तस्करी रोक्न र यस अपराधमा संलग्न व्यक्तिहरूमाथि कडा कारबाही गर्न ३३ मिलियन पाउन्ड खर्च गर्ने घोषणा गरेको छ।
यस सम्मेलनमा भियतनाम, अल्बानिया र इराकका अधिकारीहरू सहभागी हुँदैछन्, जहाँबाट ठूलो संख्यामा आप्रवासीहरू बेलायत प्रवेश गर्छन्।
त्यसैगरी, फ्रान्स, चीन र अमेरिकाका प्रतिनिधिहरू पनि सम्मेलनमा सहभागी हुनेछन्।
