बाँके । हिजरी संवतको रमदान (रमजान) महिना समापन भइरहँदा देशका अन्य भागका साथै मुस्लिम बाहुल्य भएको बाँकेमा ‘ईद’को चहलपहल सुरु भएको छ भने भोलि सोमबार ईद मनाइने छ ।
रदमानभरि रोजा (व्रत, उपवास) बसेका मुस्लिम धर्मावलम्बी शव्वाल महिनाको पहिलो तारिखमै मनाइने ईद–उल–फित्र (बोलीचालीमा ईद)को तयारीमा लागेपछि आज मुस्लिम बाहुल्य बस्तीमा रौनक बढेको हो । हिजरी संवत्को पात्रोअनुसार रमदान आज सकिएर भोलि सोमबार शव्वाल महिना सुरु हुँदैछ । शव्वालको पहिलो दिन ईद मनाइन्छ ।
मुस्लिम परम्पराको मुख्य पर्व ईद मनाउन टाढा टाढा रहेका परिवारजन घर आएका छन् ।
हिजरी संवतको पात्रोले आज रमदान सकिने उल्लेख गरे पनि इस्लाम परम्परामा सम्बन्धित क्षेत्रका अधिकारप्राप्त इमाम (धर्मगुरु) जामा मस्जिदका मुफती जाफर रजाले चन्द्रमा देखिएको घोषणा गरेसँगै भोलि ईद मनाउन बाटो खुलेको जामा मसस्जदका निवर्तमान अध्यक्ष हाजी अब्दुल रहमान मियाँले बताउनुभयो ।
इस्लाम परम्परामा चन्द्रमास (इस्लामिक पात्रोअनुसार) तालिकाअनुसार पात्रो बन्ने चलन छ । यसैले हिजरी संवत्का महिना सामान्यतया चन्द्रमा देखिने शुक्लपक्षको द्वितीया तिथिबाट सुरु हुन्छन् ।
धर्मगुरुहरूका अनुसार हिजरी संवत् परम्परामा रमदान नवौँ महिना हो । इस्लाम परम्परामा यसै महिनामा पवित्र कुरान पृथ्वीमा अवतरित भएको मानिन्छ । त्यसैले मुस्लिमहरू रमदान महिनामा दिनभरि केही नखाई उपवास बसेर सद्विचार, सद्आचरण र सत्कर्ममा लागि रहन अल्लाह (ईश्वर) सँग प्रार्थना गर्छन् । रमदान महिनाभरिको रोजा (उपवास)को उत्सवमय समापन नै ईद भएको मुस्लिम धर्म गुरुको भनाई छ। इदमा हुनेखानेले गरिबका लागि दान गर्छन् । दान जसलाई इस्लाम परम्पराले ‘जकात’ भन्छ, ।
रहमान मियाँले भन्नुभयो ‘इस्लामका पाँच आधारस्तम्भ सहादा (मुस्लिम पन्थको स्वीकारोक्ति), नमाज (प्रार्थना), रोजा (रमदान महिनाको उपवास), जकात (आफ्नो कमाइबाट गरिबलाई दिन छुटाइने रकम) र हज (मक्काको तीर्थयात्रा) हुन् ।’, उहाँले भन्नुभयो, ‘मक्का जाने कुरा आर्थिक अवस्थासँग जोडिने हुँदा स्वैच्छिक देखिन्छ, तर अन्य चार सबै मुसलमानका लागि अनिवार्य छन् ।’
