काठमाडौं । बुबा विराज भट्टको पद्चापलाई पछ्याउँदै समीरले ‘१२ गाउँ’बाट घरेलु फिल्ममा डेब्यु गरे । दशैंमा रिलिज भएको यो फिल्म सुपरहिट मात्र भएन, यसले ‘एक्सन स्टार’को रुपमा उनलाई स्थापित तुल्यायो ।
समीरको दोस्रो प्रतीक्षित फिचर ‘बलिदान’ दशैंमा प्रदर्शन तयारीमा छ । हालै छायांकन सकिएको यो फिल्मको शीर्ष भूमिकामा उनको अभिनय छ । यो एक्सन र देशभक्ति भावनाको फिल्म सम्पादन टेबुलमा छ ।
अभिनेताको रुपमा समीरलाई यो फिल्म चुनौतिपूर्ण हुनेछ, जसलाई उनी आफैले एक अन्तर्वार्तामा स्वीकारेका छन् । भीएफवाई टक्सको आगामी एपिसोडको एक कुराकानीमा समीरले ‘बलिदान’ आफ्नो लागि विशेष र चुनौतिपूर्ण रहेको बताए ।
‘म पहिलेभन्दा उत्कृष्ट पर्फमर बन्न जरुरी छ । उत्कृष्ट एक्सन पस्कन सक्ने हुनुपर्नेछ र उत्कृष्ट डान्सर पनि’ उनले दोस्रो फिल्म आफ्नो लागि किन चुनौतिपूर्ण छ भन्ने प्रश्नको जवाफमा यस्तो बताए ।
उनले प्रेरणा कुनै दन्त्यकथा जस्तै हुने बताए । ‘मोटिभेसन क्षणिक हुन्छ । तपाईं अहिले मोटिभेटेड हुनसक्नुहुन्छ तर भोलि नहुन पनि सक्नुहुन्छ । मुख्य कुरा निश्चय, अठोट र संकल्प हो जसले काम फत्ते गर्न प्रेरित गर्छ ।’
उनलाई क्याथरिनले अर्को प्रश्न सोधिन्- बलिउड र हलिउडमा जाने सोच के छ ? यसको उत्तरमा समीरले आफूले अहिले नेपाली फिल्ममा आनन्द लिइरहेको र अहिले बाहिर जाने नसोचेको बताए । ‘यतिबेला मैले नेपाली फिल्ममै आनन्द लिइरहेको छु । भविष्य कसैले पनि देखेको छैन । यो क्षणमा मैले नेपाली फिल्ममा ध्यान केन्द्रित गरिरहेको छु । नेपालीबाट मैले धेरै माया र स्नेह पाएको छु, यो निकै अविश्सनीय छ’ उनले भने ।
पहिलो फिल्मबाट आफूलाई खुला हृदयले स्वागत गरिएको बताउँदै उनले नेपाली फिल्म जगतप्रति आभार व्यक्त गरे । उनले नेपाली दर्शकले आफूलाई दिएको मायाको एक किस्सा पनि सेयर गरे ।
हल भिजिटमा जाँदा आफूले एक ह्विलचेयरमा आएका दर्शकलाई भेटाएको उनले सम्झिए । ‘ती दर्शक हिँड्न सक्ने थिएनन् । फिल्म हेरेपछि खुसी भएर मलाई बधाइ दिए । उनको मुहारमा मुस्कान थियो’ समीरले सम्झिए, ‘यो दृश्यले म निकै भावुक भएँ । म बोल्न सकिँन । एउटा मान्छेको रुपमा उनको मुहारमा देखिएको मुस्कानले मलाई आत्मसन्तुष्टि मिल्यो । एक्टरको रुपमा पनि म खुसी छु ।’
