१२ चैत, काठमाडौं । नेपाल विद्युत् प्राधिकरण भरतपुर वितरण केन्द्रका प्रमुख रामु श्रेष्ठमाथि हातपात भएको छ ।
मंगलबार बिहान १० बजेको समयमा ३५/४० जनाको समूह वितरण केन्द्रमा प्रवेश गरी कार्यलय प्रमुखलाई कुटपिट गर्नुका साथै कार्यकक्ष तोडफोड भएको केन्द्रले जारी गरेको विज्ञप्तिमा उल्लेख छ ।
‘…कार्यालयको डिजिटल सूचना बोर्डमा एक्कासि सूचना ह्याक गरी देशका सम्मानीय प्रधानमन्त्रीलाई अवैध किसिमको गाली गलोज/अपशब्द अपलोड गरिएको हुँदा देशको गरिमामय पदमा रहनु भएका प्रधानमन्त्रीलाई अपमानजन्य सूचना अपडेट गराउनु राज्यको संविधान तथा प्रचलित कानुनको बर्खिलाप हो । यस्तो गैरकानुनी कार्यप्रति नेपाल विद्युत् प्राधिकरण भरतपुर वितरण केन्द्र परिवार घोरभर्त्सना गर्दछ,’ केन्द्रले जारी गरेको विज्ञप्तिमा छ ।
उक्त घटनाको सत्यतथ्य छानबिन गरी उक्त कार्यमा संलग्न व्यक्तिलाई कानुनको दायरमा ल्याई कारबाही गर्न केन्द्रले माग समेत गरेको छ ।
युवासंघबाट हातपात र तोडफोड
प्रधानमन्त्री ओलीविरुद्ध सूचना प्रकाशन भएको विषयमा ज्ञापनपत्र बुझाउन नेकपा एमाले निकट राष्ट्रिय युवा संघका कार्यकर्ता वितरण केन्द्र पुगेका थिए ।
सो क्रममा कार्यालय प्रमुख श्रेष्ठले आफूहरूमाथि गलत व्यवहार प्रदर्शन गरेको भन्दै आक्रोशित युवा संघका कार्यकर्ताले उनीमाथि हातपात गर्नुका साथै कार्यकक्ष तोडफोड गरेका थिए ।
युवा संघ चितवनका इन्चार्ज शंकर अधिकारीले कार्यालय प्रमुख श्रेष्ठकै गलत व्यवहारले तोडफोडको अवस्था सिर्जना भएको बताए ।
उनले कार्यालय प्रमुख श्रेष्ठकै योजनामा र उनकै संलग्नतामा प्रधानमन्त्रीविरुद्ध अमर्यादित र आपत्तिजनक सूचना राखिएको बताए ।
कार्यालय प्रमुख श्रेष्ठले आफूमाथि युवा संघका कार्यकर्ताले कुटपिट गरेको बताए । घटनापछि युवा संघका कार्यकर्ताले प्रमुखको कार्यकक्षमा ताला समेत लगाएका थिए ।
प्रमुख जिल्ला अधिकारी प्रकाश पौडेल आफैं कार्यालय पुगेर युवा संघले लगाएको ताला फुटाएका थिए । उनले ताला फुटाएर घटनाका बारेमा केही भए प्रहरीमा लेखेर पठाउन केन्द्र प्रमुख श्रेष्ठलाई निर्देशन दिएका थिए ।
प्रजिले सोधे स्पष्टीकरण
प्रधानमन्त्रीविरुद्ध वितरण केन्द्रको सूचना बोर्डमा देखिएको अमर्यादित सूचनाका बारेमा प्रजिअ पौडेलले केन्द्र प्रमुख श्रेष्ठलाई स्पष्टीकरण सोधेका छन् ।
प्रजिअ पौडेलले श्रेष्ठलाई घटनाको यथार्थ विवरणसहित २४ घण्टाभित्र जानकारी पेस गर्न भनिएको छ ।
‘सरकारी कार्यालयको डिजिटल बोर्डमा कसरी प्रधानमन्त्रीविरुद्धमा सूचना लेखियो भन्ने बारेमा जानकारी माग गरेका छौं, अहिलेसम्म आएको छैन,’ प्रजिअ पौडेलले भने, ‘सरकारी कार्यालयको नोटिस बोर्डमा आपत्तिजनक सूचना आउनु गलत छ ।’
उनले यसबारेमा छानबिन समेत गरिने बताए । प्रजिअ पौडेलले घटनाको विवरण आएपछि गृह मन्त्रालय र ऊर्जा मन्त्रालयमा जानकारी पठाउने बताए ।
