९ माग, काठमाडौं । नेपाली कांग्रेस निकट राष्ट्रिय लोकतान्त्रिक अपांग संघको महाधिवेशनमा प्रतिनिधहरूले अपांगतामैत्री भोटिङ मेसिनको माग गरेका छन् ।
पार्टी केन्द्रीय कार्यालय सानेपामा हिजोबाट जारी महाधिवेशनमा दृष्टिविहीन महाधिवेशन प्रतिनिधिहरूले अपांगतामैत्री इलेक्ट्रोनिक भोटिङ मेसिनको माग गर्दै नाराबाजी गरेका छन् ।
उनीहरूले महाधिवेशनमा अपांगमैत्री भोटिङ मेसिनको माग पहिला नै गरेको भएपनि निर्देशक समितिका संयोजक मधु आचार्यले वेवास्ता गरेको आरोप लगाए ।
उनीहरूले संयोजक आचार्यविरुद्ध पनि नाराबाजी गरेका थिए ।
संघका महामन्त्री दृष्टिविहीन आश्विन लम्सालले अपांगतामैत्री भोटिङ मेसिनको व्यवस्था नभएसम्म भोटिङमा भाग नलिने बताएका छन् ।
हिजो देखि सुरु भएको महाधिवेशनमा आज निर्वाचनबाट नेतृत्व चयन गर्ने कार्यक्रम थियो । संघको नेतृत्वका लागि विकास थापा, माधव चौलागाईं र कल्पना खड्का अध्यक्षका उम्मेदवार बनेका छन् ।
