काठमाडौं । २०७२ सालको भदौ अन्त्यतिर नेकपा एमालेको अध्यक्षको रुपमा प्रधानमन्त्री केपी शर्मा ओलीले संविधान सभाबाट बाहिरिने दलहरूलाई ‘रुखबाट झरेका केही आँप’को संज्ञा दिएका थिए ।
धुम्बाराहीस्थित त्यतिबेलाको पार्टी कार्यालयमा आयोजित पत्रकार सम्मेलनमा ओलीले भनेका थिए, ‘संविधानसभाबाट तराई बाहिरिएको होइन, कोही–कोही बाहिर गएका हुन् । तराई कांग्रेससँग छ, एमालेसँग छ, एमाओवादीसँग छ ।’
ओलीको यो अभिव्यक्तिको भिडियोलाई प्रदर्शन तयारीमा रहेको फिल्म ‘राजागञ्ज’ले फिल्मभित्र पनि समेटेको छ । ओलीको उक्त भाषणको समाचार भिडियो र टेक्स्टमा अनलाइनखबरमा प्रकाशित भएको थियो ।
सार्वजनिक कार्यक्रममा ओलीले बोलेको उक्त भाषणको दृश्य फिल्मभित्र समेटेकोमा आपत्ति जनाउँदै केन्द्रीय चलचित्र जाँच समितिले दीपक रौनियार निर्देशित फिल्म ‘राजागञ्ज’लाई प्रदर्शन अनुमति दिन अस्वीकार गरेको छ ।
जाँच समितिले प्रधानमन्त्री ओलीबाट अनुमति लिएको प्रमाण पेश गर्न समेत भनेको छ । फिल्मका निर्देशक रौनियारले मिडिया कानुनअनुसार भिडियोको प्रतिलिपि अधिकार अनलाइनखबरसँग सुरक्षित रहेको र उसैबाट अनुमति लिएको तर प्रधानमन्त्रीकहाँ अनुमति माग्न जान नसकिने बताए ।
‘हामी पत्र लिन प्रधानमन्त्रीकहाँ जाने होइन । हाम्रो भनाइ भिडियो प्रयोग गर्न पाउनुपर्छ भन्ने हो । किनभने प्रधानमन्त्रीले सार्वजनिकरुपमा बोलेको कुुरा हो । भिडियोको धनी अनलाइनखबरसँग अनुमति लिएका छौं । उहाँहरूलाई आपत्ति छैन । हामीले किन हटाउनुपर्यो’ रौनियारले भने ।
उक्त दृश्य फिल्मबाट हटाउँदा कला मर्ने दीपकको भनाइ छ । ‘त्यो हटाउँदा फिल्म मर्छ, आर्टलाई त मार्नुभएन नि’ दीपकले भने, ‘संसारभर देखाइसकेको फिल्म हो । यत्रो फेस्टिभलमा देखाएको र मिडियाले लेखिसेकको हो । हामी घरमा आएका छौ । घरका दर्शकलाई फिल्म देखाउन चाहन्छौं ।’
उनले सेन्सर बोर्डसँग सहमतिको लागि प्रयास हुने बताए । यसका लागि सेन्सर बोर्डसँग ‘राजागञ्ज’को टीमले भेट्दैछ । केन्द्रीय चलचित्र जाँच समिति सेन्सर बोर्डका सदस्य ऋषिराज आचार्यले बोर्डले दिएका निर्देशनलाई फिल्मले पालना गर्नुपर्ने बताए ।
‘राजागञ्ज’ यसवर्षको भेनिस फिल्म फेस्टिभलमा वल्र्ड प्रिमियर भैसकेको छ । यो फेस्टिभलमा फिल्मले १० मिनेट लामो स्ट्यान्डिङ ओभेसन प्राप्त गरेको छ । चर्चित मिडिया र क्रिटिकले फिल्मको प्रशंसा गरेका छन् ।
मधेशको परिवेशमा खिचिएको फिल्मले सभासदका छोरासहित २ बच्चा अपहरणमा परेपछि तिनलाई मुक्त गर्न प्रहरीले चालेको खोजी अप्र्रेसनको कथा भन्छ । आशा मगरातीले शीर्ष भूमिका निर्वाह गरेको फिल्ममा दयाहाङ राई, विजय बराल, निकिता चाण्डक लगायतको अभिनय छ ।
फिल्म चैत १ गते शुक्रबारदेखि प्रदर्शन तयारीमा छ ।
