१५ मंसिर, काठमाडौं । शनिबारदेखि सुरू भएको नेपाल प्रिमियर लिग (एनपीएल) क्रिकेट प्रतियोगितामा जनकपुर बोल्ट्सले विजयी सुरूवात गरेको छ । जनकपुरले विराटनगर किङ्सलाई ८ विकेटले पराजित गरेको हो ।
खेलमा जनकपुरका लाहिरु मिलान्थाले ७५ रनको अविजित पारी खेले । उनलाई हर्श थाकरले २९ रन बनाएर साथ दिए । १२८ रनको लक्ष्य पछ्याउँदा सुरूवातमै दुई विकेट गएपछि लाहिरु र थाकर मिलेर इनिङ उकासेका थिए ।
जितपछि जनकपुरका कप्तान अनिल शाहले क्रिजमा टिकेर खेल्दा जित सम्भव भएको बताए । ‘पिच बलरहरूको लागि सहयोगी थियो अनि कसैले पनि राम्रोसँग बलमा ब्याट लगाउन सकिरहेका थिएनन्’ अनिलले भने, ‘विदेशी खेलाडीहरू अनुभवी छन् । उनीहरूबाट सिक्न पर्छ । क्रिजमा जति टिक्न सक्यो त्यति राम्रो हुन्छ अनि थाहा हुन्छ कति स्कोर राम्रो हुन्छ भनेर ।‘
‘सुरूमा मार्टिन गप्टिलले पनि खुलेर खेल्न सकिरहेका थिएनन् । पछि उनले क्रिजमा टिक्दै पिच रिड गर्दै खेल्न थाले अनि पछि उनको ब्याटबाट रन बन्न थाल्यो’ अनिलले थपे ।
अनिलले प्रतियोगिताको सुरूवातमा नै २ अंक जोड्न पाउनु महत्वपूर्ण भएको बताए । ‘हामीले प्लानिङहरू गरेका थियौं अनि त्यसकै अनुसार चल्यौं, त्यसकै कारण यो जित सम्भव भयो’ उनले भने ।
जनकपुरको टप अर्डर नचले पनि विदेशी खेलाडीहरूले क्रिजमा टिकेर खेल जिताएको उनको भनाई थियो । ‘टप अर्डर हामी चल्न सकेनौं । हामी चुके पनि लाहिरू र हर्शले राम्रो खेले र हामीले जित्यौं’ उनले भने ।
उनले एनपीएलका कुनै पनि टिम कमजोर नभएको बताए । ‘कमजोर कुनै पनि टिम छैन, विदेशी हुनु र नहुनुभन्दा नि जसले राम्रो खेल्छ उसले नै जित्छ’ अनिलले भने ।
आसिफलाई किपर नराखेको भन्ने प्रश्नमा उनले भने, ‘आसिफले नेपाली बलररूसँग कुरा गरिराख्न सकून् भनेर हो। हामीसँग मिलान्था थिए किपरको विकल्प, अनि नेपाली खेलाडीको बारेमा थाहा भएकाले सहज होस् भनेर हो।’
