काठमाडौँ– राष्ट्रिय सभा अध्यक्ष नारायणप्रसाद दाहालले आफूले पाएको भूमिका प्रधानमन्त्री पुष्पकमल दाहालसँग व्यक्तिगत रुपमा नरहेको बताएका छन्।
राष्ट्रिय सभाको बुधवारको बैठकमा उनले आफूले जनतालाई धोका हुने र पछुतो हुने कुनै काम नगरेको बताए।उनले आफूहरूको सम्बन्ध कहिल्यै पनि व्यक्तिगत वा पारिवारिक रुपमा नभएको भन्दै प्रधानमन्त्री दाहाल र आफ्नो सम्बन्ध विचार केन्द्रित सहकर्मीको रुपमा मात्रै रहेको बताए।
उनले भने, ‘मैले सम्झेसम्म जनतालाई धोका हुने र पछुतो हुने कुनै काम गरेको छैन । मैले प्राप्त गरेको भूमिका खास पारिवारिक सम्बन्धसँग जोडेर चर्चा गरिएको पनि पाएको छु। तर हाम्रो त्यो सम्बन्ध कहिल्यै पनि व्यक्तिगत वा पारिवारिक रुपमा थिएन र छैन।
हाम्रो सम्बन्ध सधैँभरि विचार केन्द्रित सहकर्मीको रुपमा रहेको छ।’उनले अध्यक्षमा मनोनयन भएपछि नै आफूले आफ्नो दलीय आवद्धता र संलग्नता त्याग गरेको बताए।
