-मन्दिरा मधुश्रीहामी मकै विभिन्न रुपमा खान्छौँ । उसिनेर, भुटेर, तरकारी, ढिडो, भात, पुवा, सुप, रोटी, दुधे कलिलो त काँचै पनि । तर मकैको जुँगा र खोस्टा काम नलाग्ने भनेर फाल्छौँ । खोसेल्टा पनि पिरा, गुन्द्री, सुकुल, ढक्की डोरी, मुडा, पुतली, बनाउन सकिन्छ । तर जुँगाको त त्यतिकै फाल्छौँ । तर थाहै छैन हामीलाई कि जुँगाको फाइदा मकैको भन्दा बढी हुन्छ भनेर ।
क्यान्सर जस्तो प्राणघातक रोगमा मकैको जुँगाको चिया राम वाण भएको पुष्टि भएको छ । आज भन्दा १२ वर्ष अगाडि म आफन्त बिरामी भेट्न भरतपुर क्यान्सर अस्पताल गएकी थिएँ । अस्पतालको गेट अगाडि एउटा सानो पुड्के हरियो मकैको पचास, साठी कसैले त ८० रुपैयाँमा बेचिरहेको देखेँ । जाबो मकै, त्यो पनि यत्रो पुड्कोको पनि यत्रो पैसा तिर्छन् कोही । तर मानिसहरू धमाधम किनिरहेका थिए । कसैले एउटा, कसैले दुइटा मात्रै भए पनि लगेको देखेँ । दुईटाले पनि एकजनालाई पनि खाजा नपुग्ने थियो ।
छ्क्क परेँ म । मैले जिज्ञासा राखेँ । हरियो मकैको भन्दा पनि जुँगाको लागि मात्रै त्यो मकै त्यति महङ्गोमा किनेका रहेछन् । ती किन्ने सबै क्यान्सर रोगीका आफन्त थिए ।
हरियो मकै जुँगा सहित उसिनेको पानी क्यान्सरको औषधि रहेछ । त्यो थाहा पाए पछि हामीले पनि किन्यौँ ।
र त्यो थाहा पाएदेखि म कहिले पनि मकैको जुँगा फाल्दिन । मकै उसिन्दा जुँगा संगै उसिनेर पानी पिउँछु । धेरै भए सुकाएर राख्छु र अन्य हर्बलमा मिसाएर चियाको रूपमा पिउँछु ।
यसबाहेक मकैमा प्रशस्त पोषण तत्व हुन्छ । मकै खाएर मानिसका अनुहारमा हुने चाउरी हटाउन र बुढोपनबाट हुन दिँदैन । साथै मुटु, रक्त नली पनि खुला राख्छ ! मकैको जुँगा खाँदाको अन्य पनि फाईदा छन् ।
पिसाब लगाउनः
कुनै पनि कारण शरीरका कोषहरूमा पानी जम्ने वा पानी जमेर सुन्निने समस्या पैदा भयो भने मकैको चियाको सेवन लाभदायी हुन्छ । महँगा र शरीरलाई नोक्सानी पुर्याउने विभिन्न थरी पिसाब लगाउने औषधिहरूको तुलनामा यो अति सुरक्षित हुन्छ ।
मिर्गौलाको पत्थरीः मकैको जुँगाको चियाले पिसाब लगाउने भएको कारण यसको नियमित सेवनले मिर्गौलामा पत्थर बन्ने सम्भावना पनि न्यून बनाइदिन्छ । ख्याल गर्नुपर्ने कुरा के छ भने, यसले पत्थरी बन्न दिँदैन तर पहिल्यै पत्थरी भइसकेको छ भने त्यसको उपचारमा चाहिँ यो काम लाग्दैन ।
रक्तचाप घटाउँछः
उच्च रक्तचापको समस्या विश्वव्यापी रूपमै एउटा ठूलो नसर्ने रोगको रूपमा स्थापित भइसकेको छ । उच्च रक्तचापको एउटा विन्दुमा पुगेपछि अनिवार्य रूपमा औषधिको सेवन गर्नैपर्ने हुन्छ । तर मकैको जुँगाको चिया नियमित रूपमा सेवन गर्ने हो भने त्यसले उच्च रक्तचापलाई पनि घटाइदिने गर्छ ।
मोटोपन घटाउँछः
मोटोपन आजभोलि आम समस्या बन्दै गइरहेको छ । मोटोपनका कारणहरू विभिन्न हुन्छन् र तीमध्ये एक शरीरमा पानीको मात्रा बढी सञ्चिति हुनु पनि हो । यो खालको मोटोपन घटाउनमा चाहिँ मकैको जुँगाले भूमिका निर्वाह गर्न सक्छ ।
अब पिउने हैन त आजैदेखि मकैको चिया ?
