चन्द्रसूर्य समाचारदाता/
वीरगंज, असार/ पर्सा जिल्लामा रहेका निजी विद्यालयहरुले विभिन्न बाहनामा अभिभावकहरूको ढाड सेकिने गरि शुल्क असूलीको नाममा मच्चाईरहेको लूट विरुद्ध अभिभावक संघर्ष समितिले शुरू गरेको चरणवद्ध आन्दोलन आज पनि जारी राखेका छन्।
विद्यालयलाई शिक्षाको मंदिर भनिएपनि निजी विद्यालयहरुले मनोमानी ढंगले जथाभावी शुल्क लिने क्रम बढन थालेपछि अभिभावक संघर्ष समितिले चरणवद्ध आंदोलनको थालनी गरेको समीतिका धिरेन्द्र तिवारीले बताउनु भयो।
सोही आंदोलन अन्तर्गत समितिले मंगलबार वीरगंजको घण्टाघरबाट मोटरसाइकल ऱ्याली निकालेका छन्। निजी स्कूलले मनोमानी फी लिन पाउंदैन, विद्यालय शिक्षाको मन्दिर हो व्यापार गर्न पाइंदैन, किताब र पोशाकमा हुने कमिशन बन्द गर, निजी विद्यालयले वार्षिक शुल्क लिन पाइंदैन, शिक्षालाई व्यापारीकरण गर्न पाईदैन जस्ता नारा अंकित प्लेकार्ड बोकेर घंटाघरबाट शुरू भएको मोटरसाइकल ऱ्याली शुरू भएर मकालु होटेल, घड़ीअर्वा पोखरी, माइस्थान हुँदै पावर हाउस, प्रतिमा चौक, बसपार्क हुँदै पुनः घण्टाघरमा पुगेर कोणसभामा परिणत भएको थियो।
यसैबीच अभिभावक संघर्ष समितिको मागहरू सम्बन्धमा बुधबार वीरगंज महानगर र अभिभावक संघर्ष समितिबीच बार्ता हुने भएको छ।
