चन्द्रसूर्य समाचारदाता/
वीरगंज, २७ कार्तिक/ वीरगंज-कलैया सडकखण्डमा बिहीबार साँझ ईको भ्यानले ठक्कर दिंदा एकजना मोटरसाइकल चालक गम्भीर घाइते भएका छन् ।
बाराको प्रसौनी गाउँपालिका वडा नं.२ श्वेतानगर चोक स्थित सडक खण्डमा वीरगंजबाट प्रसौनी तर्फ जाँदै गरेका प्रदेश ३-०१०२२च७३१८ नं.को इको भ्यानले बीरगंजबाट कलैयातर्फ जाँदै गरेको प्रदेश २-०-३००६प७८८९ नं.को मोटरसाइकललाई ठक्कर दिंदा मोटरसाइकल चालक कलैया-३ बस्ने किरब २३ वर्षका नागेश्वर प्रसाद कुशवाहा घाइते भइ उपचारको लागि वीरगंजस्थित न्यूरो अस्पतालमा पठाइएको इलाका प्रहरी कार्यालय प्रसौनी गण्डकका प्रहरी निरीक्षक ओम प्रकाश यादवले बताउनु भयो ।
इप्रका कार्यालय भन्दा झण्डै १ किलोमिटर पूर्वको दूरीमा रहेको घटनास्थलमा समयमै प्रहरी पुगेर घाइतेको उद्धार गर्न तथा दुर्घटनाग्रस्त गाडीसहित चालकमा नियन्त्रणमा लिइ घाइते कुशवाहालाई अस्पताल पठाउन सकिएको बताइन्छ ।
घाइते चालकको स्वास्थ्यस्थिति गम्भीर रहेको प्राप्त समाचारमा जनाइएको छ । घटनावारे विस्तृत जानकारी आउन बाँकी रहेको प्रहरीले चन्द्रसूर्य वाणीलाई बताएको छ ।
