चन्द्रसूर्य समाचारदाता/
काठमाण्डौ । राष्ट्रिय एकता दिवस तथा पृथ्वी जयन्ती देशभरका सर्वसाधारण नागरिक र संघसंगठनहरुले विभिन्न कार्यक्रमको आयोजना गरी मनाइरहेको खबरसँगै जय देशभक्त पार्टीले पनि विविध कार्यक्रम गरी राष्ट्रिय एकता दिवस तथा पृथ्वी जयन्ती भव्यताका साथ मनाएको छ ।
राष्ट्रिय प्रजातन्त्र पार्टी चितवन जिल्ला कार्यसमितिसँग सहकार्य गरी एकताको सन्देशका साथ जय देशभक्त पार्टीले चितवनको रत्ननगरमा नेपाल राष्ट्रका एकीकरणकर्ता, राष्ट्रनिर्माता श्री ५ बडामहाराजाधिराज पृथ्वी नारायण शाहको २९८ औं जन्मजयन्ती तथा राष्ट्रिय एकता दिवस मनाएको हो ।
जय देशभक्त पार्टीका केन्द्रिय अध्यक्ष डा. अधिकारीले वरिष्ठ उपाध्यक्ष गजेन्द्र बहादुर अर्याल, उपाध्यक्ष डि.बी.अधिकारी, महासचिव कान्त बहादुर पौडेल, सचिव इश्वर प्रसाद सेढाई, कोषाध्यक्ष राम प्रसाद न्यौपाने लगायत चितवन जिल्ला कार्यसमितिका पदाधिकारी राप्रपा का जिल्ला तथा स्थानीय स्तरका नेता कार्यकर्ता र सर्वसाधारण सहितको सहभागितामा राष्ट्रिय एकता दिवस तथा पृथ्वी जयन्ती मनाइएको हो ।
कार्यक्रमका सहभागीहरुले सो क्रममा राष्ट्रनिर्माताले देश निर्माणमा पुर्याएका योगदानको चर्चा गर्दै देशको रक्षाका लागि सम्पूर्ण देशभक्त जनताहरु एकचोटी फेरी पनि राष्ट्रनिर्माता पृथ्वी नारयण शाहले देखाएको बाटो र दिएको सन्देशलाई व्यवहारमा उतार्नु पर्ने कुरामा जोड दिएका थिए ।
