चन्द्रसूर्य समाचारदाता/
काठमाण्डौ, ७ कार्तिक/
तराई मधेशको पर्यटन प्रवर्द्धन र विकासकोलागि भिजिट मधेश नेपालको टोलीले सांस्कृति पर्यटन तथा नागरिक उड्डयन मन्त्री योगेश भट्टराईलाई ध्यानकर्षण गराएका छन् ।
भिजिट मधेश नेपालका राष्ट्रिय संयोजक ओमप्रकाश सर्राफको नेतृत्वमा रहेको टोलीले बुधबार बिहान पर्यटन मन्त्री भट्टराईसँग भेटघाट गर्दै ध्यानाकर्षण पत्र बुझाएको हो । तराई मधेशको पर्यटन प्रवर्द्धन बिना नेपालको समग्र क्षेत्रमा विकास नहुने भएकोले तराई मधेशमा बढी ध्यान दिन मन्त्री भट्टराईलाई भिजिट मधेशको टोलीले आग्रह गरेको थियो ।
पर्यटन मन्त्रालयले नेपालको पर्यटकीय क्षेत्रमा पुर्याई रहेको योगदान सराहनीय रहेको भन्दै हिमाल पहाडलाई मात्र नभई तराई मधेसको २४ वटै जिल्लाको सांस्कृतिक धरोहरहरु पनि ध्यान केन्द्रित गर्न अध्यक्ष सर्राफले अनुरोध गरे । तराईको फरक हावापानी पर्यावरण, ऐतिहासिक, पुरातात्त्विक धार्मिक धरोहरहरुले पर्यटकहरुलाई झन आकर्षित गर्न मद्दत पुग्ने उनले पत्र मार्फत मन्त्री भट्टराइको ध्यानाकर्षण गराए ।
ध्यानाकर्षण पत्र बुझ्दै मन्त्री भट्टराईले आफु नेपालको पर्यटन प्रवर्द्धनको विकासमा लागि परेको बताए । उनले तराई मधेशको धेरै जिल्लाहरुमा पर्यटकलाई भित्र्याउने सम्भावना रहेकोले त्यसको पहिचान भईसकेको समेत बताए । मन्त्री भट्टराईले पहिचान भईसकेको तराई मधेशका पर्यटकीय स्थलहरुको प्रवर्द्धन र विकास गर्न लागि परेको जानकारी गराए ।
आन्तरिक एवं बाह्य पर्यटकहरुको सुविधाको लागी भिजिट मधेसको डिजिटल प्लेटफर्म वेबसाईट मोबाइल एप्स पनि तयार गरी प्रचार प्रसारमा जुटेको जानकारी गराए । साथै विश्व पर्यटन दिवस २०१९ को अवसरमा भिजिट मधेश अभियानले काठमाडौ सहित नेपाल भरीका ३५ वटा जिल्लाको पर्यटकिय स्थलको सरसफाइ पर्यटन सम्बन्धि अन्तरक्रिया समेत गरेको थियो ।
भिजिट मधेशका राष्ट्रिय सदस्य अजयप्रसाद साह, काठमांडौ संयोजक सुनिता रौनियार, सदस्य प्रयुषा थिङ्ग र टेक्निकल एक्सपर्ट सुरज वर्मा लगायतको टोलीमा सहभागिता रहेको थियो ।
