जनकपुरधाम : महोत्तरीको औरही नगरपालिका–३ स्थित एक महिलाले भारतीय नागरिक ज्वाईँलाई नेपाली नागरिकता दिलाउन आफ्नै छोरा भन्दै विवरण पेश गरेकोमा प्रहरीले पक्राउ गरेको छ ।
औरहीकी ३९ वर्षीया शिवो देवीले ज्वाईँ २१ वर्षीय राजपाल सहनीलाई आफ्नै जेठो छोरा सरोज सहनीको नाममा नागरिकता बनाउन कागजात पेश गरेकी हुन् । भारतको बिहारस्थित मुजफ्फपुर शिबदाशपुर दौहा–६ बस्ने देवीका जेठो ज्वाईँ पनि पक्राउ परेका छन् ।
भारतीयलाई नेपाली नागरिकता दिन झुठो विवरण पेश गरेको भन्दै प्रहरीले सोमबार उनीहरुलाई पक्राउ गरेको हो । इलाका प्रहरी कार्यालय गौशालाका प्रहरी निरीक्षक किशोर आचार्यको कमाण्डमा खटिएको प्रहरी टोलीले उनीहरुलाई पक्राउ गरेको हो । प्रहरीले राजपालको साथबाट भारत सरकारले जारी गरेको आधा कार्ड र मोटरसाइकलको लाइसेन्स पनि बरामद गरेको छ ।
घटनापछि दुबैजनामाथि झुठो विवरण पेश गरी नेपाली नागकिरता लिन खोजेको कसुरमा मुद्दा दर्ता गरी कारवाही थालेको छ ।
