सर्लाही । मधेस प्रदेशको सर्लाही जिल्लामा वर्षौँदेखि चल्दै आएको तस्करी पछिल्ला दिनमा झनै व्यवस्थित र निर्बाध बनेको छ । स्थानीय स्तरमा उठेका गम्भीर आरोपअनुसार नेपाल प्रहरी र सशस्त्र प्रहरी दुवै निकायका केही जिम्मेवार व्यक्तिहरूको संरक्षणमा सीमा आर-पार तस्करी खुलेआम सञ्चालन भइरहेको छ ।
स्रोतले जनाएअनुसार जिल्ला प्रहरी कार्यालय सर्लाहीका प्रमुख एसपी योगेन्द्र खड्काको कार्यकालमा तस्करी सहज बनाउने एउटा समन्वित नेटवर्क सक्रिय छ । सखुवबा, फेनहरा, हिरापुर ब्यारेज, बहादुरपुर, मधुवनी गोठ, अर्नाहा, बलरा, संग्रापुर नाकाबाट भारततर्फबाट दैनिक रूपमा कपडा, सुपारी, सुर्ती, खाद्यान्न, किराना, बीउ, मोबाइल, चिनी, खाददेखि कुखुरासम्मका सामग्री बिना रोकटोक नेपाल भित्रिने गरेको दाबी गरिएको छ ।
यी सामग्रीहरू वयलवास, लालबन्दी, हरिवन र बरहथवा आसपासका गोदाममा संकलन गरी पिकअप, अटो र ट्रकमार्फत् काठमाडौंसहित बागमती र मधेसका विभिन्न जिल्लामा पठाइने गरेको बताइन्छ ।
घुमुवा प्रहरीको ‘सेटिङ’ आरोप
नेपाल प्रहरीतर्फ तस्करी व्यवस्थापन गर्ने मुख्य पात्रका रूपमा जिल्ला प्रहरी कार्यालय सर्लाहीका घुमुवा प्रहरी सहायक हवल्दार भाग्यनारायण साहको नाम बारम्बार जोडिँदै आएको छ । नाकामा खटिने असईदेखि स्थानीय एजेन्ट, सवारी पास, रकम संकलन र बाँडफाँडसम्मका काम साहकै समन्वयमा हुने गरेको स्रोतको दाबी छ । उनलाई उच्च तहको संरक्षण रहेको चर्चा प्रहरीभित्रै छ ।
बिओपीकै छेउमा गोदाम, खुलेआम ओसारपसार
सखुवबा नाकामा तस्करीको अवस्था यति निर्लज्ज बनेको बताइन्छ कि सशस्त्र प्रहरीको बिओपी सखुवबाबाट केही मिटरकै दूरीमा कवाडको गोदाम सञ्चालन भइरहेको छ । स्थानीयका अनुसार कृष्ण यादवले सञ्चालन गरेको उक्त गोदामबाट दैनिक रूपमा कवाड, धान र गहुँ भारत-नेपाल ओसारपसार हुँदै आएको छ ।
अटोमार्फत् तस्करी र मासिक ‘सेटिङ’
सीमावर्ती क्षेत्रबाट अटो प्रयोग गरी किराना, हार्डवेयर र कपडाको तस्करी गर्ने बबिता महतो र हुसैनी नामका व्यापारीहरू पनि सक्रिय रहेको स्थानीय व्यापारीहरूको भनाइ छ । उनीहरूले मासिक रूपमा निश्चित रकम बुझाएर अटो र गाडीहरू चेकजाँचबिनै पास गराउँदै आएको आरोप लगाइएको छ ।
तस्करी सञ्जालमा जोडिएका अन्य नाम
कपडा, किराना र खाद्यान्न तस्करीमा हिरालाल साह, इन्दु शहनी, रामेश्वर साह, करन्जित बैठाव, अमामुल, सुरेश यादव, प्रमोद यादव, बृज यादव, मुकेश शाह, बिनोद शाह, सुरेन्द्र यादव, रौशन यादव, कन्हाई पण्डित र रसिया यादव संलग्न रहेको आरोप छ ।
नवीन चौधरी ‘मुना’ कपडा, काठ, मकै र बीउ तस्करीमा, राजेश ठाकुर मकै, पटाका र बीउ भारतबाट ल्याउने तथा नेपालबाट स्याउ पठाउने कारोबारमा संलग्न रहेको बताइन्छ । ‘सन्तोष डिलर’ भनेर चिनिने चन्तोष शाहले पर्सा र सखुवबा नाकाबाट किराना र स्याउको कारोबार गर्दै आएको आरोप छ । मोबाइल र बीउ तस्करीमा धर्मेन्द्र महतो, चिनी–खादमा गैरका दिनेश महतो, धानमा अजय शाह र कुखुरा तस्करीमा भाड्सर–खुटौना नाकाका दिपक कलवार चौधरी सक्रिय रहेको जनाइन्छ । नवलपुर क्षेत्रमा किराना तस्करी सुबोध चौधरीको नियन्त्रणमा रहेको आरोप पनि छ ।
सशस्त्र प्रहरीको नाम जोडिएको असुली
यसअघि सशस्त्र प्रहरीतर्फबाट रोशन मिश्र नामका व्यक्तिले आफू ‘घुमुवा’ भन्दै व्यापारीहरूबाट रकम असुली गरेको आरोपसमेत सार्वजनिक भइसकेको छ । स्थानीयका अनुसार मिश्रले हेडक्वार्टरबाट खटिएको भन्दै तस्कर र व्यापारीसँग पैसा उठाएर फर्किने गरेका थिए ।
जुवा अखडासमेत संरक्षणमा?
तस्करीसँगै जुवा अखडा सञ्चालनमा समेत संरक्षण रहेको आरोप उठेको छ । मलंगवाका ललन साह कानु र श्याम कलवारले ब्रह्मपुरी गाउँमा जुवा अखडा सञ्चालन गरिरहेको र यसमा समेत घुमुवा प्रहरीको मिलेमतो रहेको स्थानीयको दाबी छ । जानकारी हुँदाहुँदै पनि कारबाही नहुनुले प्रशासनको भूमिकामाथि गम्भीर प्रश्न खडा भएको छ ।
नाकादेखि गोदाम, तस्करीदेखि असुली र जुवासम्मका गतिविधि सार्वजनिक चर्चामै आइसके पनि जिल्ला प्रशासन, प्रहरी प्रधान कार्यालय, सशस्त्र प्रहरी मुख्यालय र गृह मन्त्रालयको मौनताले शंका थप गहिरिएको छ । सर्लाहीको तस्करी साम्राज्यमाथि राज्य कहिले र कसरी हस्तक्षेप गर्छ हेर्न बाँकि छ?
