काठमाडौं । तमु ल्होसारको छेकोमा फिल्म ‘ऊनको स्वीटर’को नयाँ गीत ‘मखमली’ युट्युवमा सार्वजनिक भएको छ । विहीबार सार्वजनिक गीत ‘कौडा, चुट्का’मा लयमा आधारित छ ।
गीतको भिडियोमा फिल्मका दुई मुख्य पात्रको प्रेम संवेगलाई चित्रण गरिएको छ । फिल्मको शीर्ष भूमिकामा विपिन कार्की र मिरुना मगरले अभिनय गरेका छन् ।
गण्डकी प्रदेशमा प्रसिद्ध यो भाकाको प्रयोग फिल्ममा भने पूर्वी नेपालको पाँचथरको आञ्चकलितामा प्रस्तुत गरिएको छ । फिल्मको छायांकन पाँचथर र नेपाल-भारत सिमाना फालेलुङमा गरिएको छ ।
गीतमा सुजन चापागाईँ र सुनिता थेगिमको स्वर छ । हर्क साउदको शब्द रचना र गायक चापागाईँकै संगीत छ । कोविद बज्र संगीत निर्माता हुन् । दीप गुरुङले नृत्य निर्देशन गरेको गीतको भिडियोमा अभिनेता विल्सनविक्रम राईलाई रोचक भूमिकामा प्रस्तुत गरिएको छ ।
बैशाख २६ गते रिलिज तयारीमा रहेको फिल्ममा सुनिल पोखरेल, माओत्से गुरुङ, प्रेम सुब्बा, एलेक्स पारस, परीक्षा लिम्बु, सुरज तमु शारदादेवी सिलवाल, भावना खपाङ्गी मगरको पनि अभिनय छ ।
नवीन चौहानले निर्देशन गरेको फिल्मलाई आर्टमाण्डु प्रालिले निर्माण गरेको हो । यो ब्यानरले यसअघि ‘घुमी घुमी,’ ’देखेर तिमीलाई- तीन पाते,’ ‘फूलथुङ्गे रानी,’ ’चन्द्रमा’ जस्ता सांगीतिक फिल्म बनाएको थियो ।
चौहानको यो डेब्यु निर्देशकीय फिल्म हो । पटकथा लेखनमा चौहान र सुरज कटुवालले सहकार्य गरेका छन् । चलचित्रको एसोसिएट निर्माता केन्द्र मोसन पिक्चर्स हो । सह-निर्मातामा साहाङ्ग चेम्जोङ, आशिष रिजाल, राजकुमार राई, प्रकाश बस्नेत र सन्तोष न्यौपाने छन् । कार्यकारी निर्मातामा सागर बुढाथोकी र मिलन खत्री छन् ।
