काठमाडौं । नेपाल प्रहरीका महानिरीक्षक बसन्तबहादुर कुँवरको दरबन्दी पठाओ अभियानलाई मातहतका प्रहरी कार्यालयले कार्यान्वयन गरेका छैनन् । केही दिनअघिमात्र नेपाल प्रहरीका प्रवक्ता भीमप्रसाद ढकालले दरबन्दीमा नजाने, रमाना नलिनेलाई मात्र होइन, काजमा राख्ने कार्यालय प्रमुखसम्मलाई कारबाही गर्ने अभिब्यक्ति दिएका छन् । गृहमन्त्री रवि लामिछानेले घुमुवा नराख्ने निर्देशन जारी गरे पनि त्यो कार्यान्वयन हुन नसकेका तथ्यहरु एकपछि अर्को सार्वजनिक भइरहेका छन् ।
यसैक्रममा जिल्ला प्रहरी कार्यालय रौतहटका तत्कालीन प्रमुख एसपी महेन्द्र श्रेष्ठको पालामा रमाना दिइएका बदनाम घुमुवाहरुलाई पुनः थमौती गर्दै सीमा क्षेत्रमा भन्सारछली गर्नेहरुसँग असुलीमा परिचालन गरिएको छ । श्रेष्ठलाई तानेपछि नयाँ एसपीका रुपमा दिलीप घिमिरे गएका छन् । कमाण्ड कन्ट्रोलमा कमजोर घिमिरे गएपछि रौतहटमा डीएसपी एलिजा गिरीको हैकम चल्न थालेको छ । गिरीले नै मजरुल होदा र सुरेन्द्र सुृरेन्द्र दुवेलाई घुमुवा राखी तस्करी गर्नेहरुसँग हप्ता र महिना असुलीमा लगाएको आरोप छ ।
दर्जाले सिपाही भए पनि होदा र दुबे लामो समयदेखि रौतहट जिल्ला प्रहरीका घुमुवाका रुपमा काम गर्दैआएका छ्न । होदा असई श्याम साह रौतटहको घुमुवा इन्चार्ज हुँदा त्यसको कमाण्डमा खटिने गरेका थिए । सोलु सरुवा भएपछि असई साहले राजीनामा दिएर बिदा भएका थिए । होदाको दरबदी सर्लाही हो । रौतहटकाा यसअघिका एसपी महेन्द्र श्रेष्ठले उनलाई रमाना गर्न निर्देशन दिए । डीएसपी गिरीले १५ दिनको बिदासहितको रमाना दिएकी थिइन् । महेन्द्र श्रेष्ठको बीचमा सरुवा भएर दिलीप घिमिरे गएपछि डीएसपी गिरीले घिमिरेलाई प्रभावमा पारेर होदाको रमानापत्र रद्द गराएर अहिले रौतहटमै घुमुवा बनाएर राखेकी छन् ।
रौतहटको तस्करीको नेटर्वकका जानकार होदा र दुवेले गौर नाकाबाट सामान ओसारपसार गर्ने अरबेन्द्र, बद्री, ओमप्रकाशलाई किराना सामानको लाइन दिएका छन् । कपडा र किरानाको सामान ल्याउने २५ महिलाको समूहले पनि यी घुमुवाहरुलाई दस्तुरी बुझाउने गरेका छन् । बेलबिछवा नाकाबाट ठूला कारोबारी वीरेन्द्र साह हुन् । उनले नेपाली मदिरा बिहारतर्फ पठाउने गरेका छन् । बिहारमा मदिरा निषेध भएकाले केही बर्षदेखि नेपालबाट तस्करीको माध्यमबाट जाने गरेको छ ।
घुमुवा होदा र दुवेले नेपालबाट मदिरा लगायतका सामान र भारतबाट कपडा लगायत किराना सामान भित्र्याउने ब्यापारीसँग लाइन मिलाएर डीएसपी गिरीबाट संरक्षण पाउने गरेका छन् । जसको भागबण्डा डीएसपीदेखि एसपीसम्म पुग्ने गरेको स्रोत बताउँछ ।
मठिया नाकामा धान तस्करीको लाइन सुनिल साह र धर्मजीत साहलाई दिइएको छ । मासिक ५० हजार दररेट तोकेर धान तस्करीको लाइन दिइएको स्रोतको दाबी छ । धान तस्करीको सूचना नागरिकस्तरबाट पाएपछि प्रहरी निरीक्षक उमाशंकर गुप्ताले बैशाख १८ गते राति गोदाममा छापा मारेर धान बरामद गरेका थिए । मटिया नाकामा असई हसमुद्दिन मियाँ इन्चार्ज छन् । घुमुवा होदा र मियाँ मिलेर लाइन मिलाएर धान तस्करी गर्ने गरेका छन् ।
यता डिएसपी एलिजा गिरीले घुमुवा नराखेको तर आवश्यकता परेको बेला सादा पोषाकमा पठाउने गरेको दाबी गर्दै आएकी छिन्।
यो पनि हेरौँ
भारतबाट धानको कमसल बिउ ल्याउन तस्करलाई रौतहट प्रहरीको “लाइन”
