काठमाडौँ । सेयर व्यापारी दीपेन्द्र अग्रवाल पुनः पक्राउ परेका छन्।
प्रहरीको केन्द्रीय अनुसन्धान ब्यूरो (सिआईबी)ले अग्रवाललाई बिहीबार काठमाडौँको महाराजगञ्ज क्षेत्रबाट पक्राउ गरेको प्रहरी प्रधान कार्यालय स्रोतले जनाएको छ।
यसअघि पनि अग्रवाल साउन ५ गते ठगी तथा आपराधिक लाभ लिन नहुने कसुरमा पक्राउ परेका थिए। सोही प्रकरणमा अनुसन्धानपछि उनी छुटेका थिए। तर पाँच महिनापछि सिआईबीले उनलाई पुनः नियन्त्रणमा लिएको हो।
प्रहरी स्रोतका अनुसार अग्रवाललाई थप अनुसन्धानका लागि पक्राउ गरिएको भए पनि पक्राउको ठोस कारण भने हालसम्म सार्वजनिक गरिएको छैन। सिआईबीले अनुसन्धान प्रभावित हुन सक्ने भन्दै यसबारे औपचारिक विवरण नदिएको जनाएको छ।
अग्रवाल सेयर कारोबारसँग सम्बन्धित विभिन्न गतिविधिमा संलग्न रहँदै आएका व्यक्ति हुन्। यसअघि उनीमाथि सेयर बजारसँग सम्बन्धित ठगी तथा आर्थिक अनियमितताका आरोप लागेका थिए। अहिलेको पक्राउ पनि आर्थिक अपराध र वित्तीय कारोबारसँग जोडिएको हुन सक्ने प्रहरी स्रोतको अनुमान छ।
हाल अग्रवाल सिआईबीको नियन्त्रणमा छन् र आवश्यक बयान तथा कागजात संकलनको प्रक्रिया अगाडि बढाइएको छ। अनुसन्धानको निष्कर्षअनुसार थप कानुनी प्रक्रिया तय गरिने प्रहरीको भनाइ छ।
यस विषयमा सिआईबीले औपचारिक धारणा सार्वजनिक गर्न बाँकी रहेको छ।
