तेलअभिभ/ युद्धग्रस्त गाजामा बन्धक बनाइएका नेपाली युवक विपिन जोशीको नयाँ भिडियो सार्वजनिक गर्ने तयारी भइरहेको छ।
होस्टेज फ्यामिली फोरमका अनुसार इजरायली रक्षा बल (IDF) ले गाजाबाट बरामद भएको उक्त भिडियो बुधबार साँझ सार्वजनिक गर्न लागेको हो। यो सामग्री जोशी परिवारको अनुमति लिएर सार्वजनिक गर्न लागिएको जनाइएको छ।
फोरमले जारी गरेको विज्ञप्तिमा भनिएको छ – “सन् २०२३ अक्टोबर ७ मा हमासद्वारा अपहरण गरिएपछि गाजामा बन्धक बनाइएका विपिन जोशीको भिडियो परिवारको सहमतिको आधारमा सार्वजनिक गर्न लागिएको हो।”
हमाससँग नजिक एक सञ्चार माध्यमले उक्त भिडियो गाजाबाट बरामद गरिएका लुटिएका वस्तुहरूमध्ये रहेको बताएको छ। सो भिडियो इजरायली सेनाले नियन्त्रणमा लिएपछि गुप्तचर अधिकारीहरूले अध्ययन गरी जोशी परिवारलाई यसको जानकारी गराएका थिए।
अनुमान अनुसार भिडियो सन् २०२३ को नोभेम्बर महिनामा खिचिएको हो, जसमा विपिन जोशी हमासको नियन्त्रणमा रहेको देखिन्छ।
जोशी परिवारका सदस्यहरूले यो दृश्यलाई *“जीवनको नयाँ संकेत”*को रूपमा लिँदै भनेका छन् – “गाजामा फेला परेको यस प्रमाणले हामीलाई उहाँ जीवित हुनुहुन्छ भन्ने दृढ विश्वास दिएको छ।”
विपिन जोशी युद्ध सुरु हुनुअघि एक महिना मात्र अगाडि नेपालबाट इजरायलको किब्बुत्ज अलुमिम पुगेका थिए। उनी कृषि अध्ययनका लागि त्यहाँ कार्यरत थिए। अक्टोबर ७ को बिहान हमासको आक्रमणका बेला उनी आफ्ना साथीहरूसँग आश्रयस्थलमा लुकेका थिए। पहिलो ग्रिनेड उनैले समातेर बाहिर फ्याँके पनि दोस्रो ग्रिनेड विस्फोट हुँदा उनी अचेत भएका थिए। त्यसपछि हमास लडाकुहरूले उनलाई अन्य केही नेपाली कामदारहरूसँगै गाजातर्फ लगेका थिए।
गत अगस्टमा विपिनको परिवार पहिलोपटक तेलअभिभस्थित ‘होस्टेज स्क्वायर’ पुगेको थियो। त्यहाँ उनकी बहिनी पुष्पा जोशीले भावुक हुँदै भनिन् – “हामीलाई यहाँ आइपुग्न २२ महिना लाग्यो, नेपालमा हामी एक्लै भयौं। दाजु, आशा नछोड, बलियो बन, जीवित रह।”
हाल पुष्पा जोशी र उनकी आमा विपिनको रिहाइका लागि अमेरिकामा छन्। उनीहरूले राष्ट्रसंघलगायत विभिन्न अन्तर्राष्ट्रिय निकायमा आफ्नो आवाज उठाइरहेका छन्।
स्रोत: होस्टेज फ्यामिली फोरम / इजरायली रक्षा बल (IDF) / अन्तर्राष्ट्रिय सञ्चार एजेन्सीहरू
